Huan, a va muh un a naungek tanchin angel in a hilh tuh a gen thangta uh. Huan, a za peuhmah in belam chingmite thugen lamdang a sa mahmah uh (Lk.2:17-18).
Jesu pian nitak a belampute tanvou piak a a-om uh ngaihtuah mah dih. Amau gan ching a om maimai lai van akipan lapawl kilawmtak angelte sak azak ding dan khawng uh mitkha a en in ngaihtuah sin mah dih. Angel in a hilh bangbang a Jesu va zong a, gan an piakna kuang a puan a om tuam a om a va muh ding dan khawng in na ngaihtuah thei hia?
Amau dinmun a ding din kingaihtuah le chin, huai nitak in bang chi om din na kingaihtuah a? Hiai bang tuk a thu kipahhuai hikei mahleh ka hinkhua ah kipak petmah a ka kipahna ka tuahkhak a om sam hi. Huai bang hun in midang kiang a genkhiak kal ka ngaklah thei mahmah a, ka gengen peih hi. Belampute’n a kipahna uh, hampha a kisakna uh amau kia a im mang mai lou in, midangte kiang ah a gensawn uhi.
I Toupa Jesu hong pian lai, a sihna lai, a thohnawn lai leh van a pitouh a a-om lai mu ding in i om kha kei hi. Himahleh hong piang a, hong si a, thounawn a, van a paitou ahi chih i thei hi. Midang tampite theih khaklouh thu thei kha in, hamphatna piak in i om hi.
Bangziak a en Jesu toh kisai i thu theihte midang kua hiam kiang a hilhsawn lou a om thei ding ihia?
Pa aw, na Tapa Jesu Khrist ka theihna ding ua hamphatna hon piakte ziak in ka kipak uhi. Angmasial tak a ka thu theihte uh kou mau a im mang mailou a, midangte kiang a gensawn sam thei ding in hon panpih in.
Unaute zingpha. Tuni hun zatnuam chiat.