...hiai ka sisan, khelhnate ngaihdamna ding a mi tampi dia pawt ding, thukhunna tuh ahi (Matt.26:28).
Sisan bangzah vei hiam ka pekhata a, a tam zaw tanaute ahihkeileh lawmte a ding ahi hi. I it-te a ding a bang hiam thil khat piak theih in ei ah kipahna hon tun hi.
Taksa tung akipan sisan kikhai khia et hak samah leng sisan piak haksa ka sa khol kei hi. Ka lungvaih louhna ding in nek ding limtak leh theitui piak in ka om a, sisan piakna mun a staff ten siamtak in ka lungmuan theihna ding a hon houpih un ka thei hi.
En sisan i piak leh Jesu’n kross a sisan a piak tehkak theih vual hi kei maw! En sisan i piak chiang in hoihtak, siamtak leh zahbawl tak a bawl in i om hi. Mun khenkhat bang ah i thilhoih hih chiamtehna ding certificate piak in i om zomah hi.
Rome sapaihte’n Jesu duattak in a bawl kei ua, nek ding leh dawn ding limtak leng a pe kei uhi. Kross tuh a puak nop dia bawl ahi kei a, a sikkilhte leng natna hik a kailouhna dia hihsiang (sterilize) ahi kei uhi. A thilhoih hih pahtak nak sang in a na theipen leh a zumhuai theipen dia bawl in a om zaw hi.
Jesu’n a tanaute leh a lawmte a ding a sisan pia ahi kei a, a melmate adia si ahi zaw sop hi (Rom.5:6-8; Kol.1:21-22).
Ei mihingte bang a sisan tamlou chik pia ahi kei a, a sih dong in a pia in, a sisan teng a pe bei hi.
Hehpih siam Pa aw, na Tapa sisan ziak a ka khelhnate uh sawpsiang a om ahihziak in na min phat in na kiang ah kipahthu kon gen uhi.
Unaute zingpha. Tuni hun zatnuam chiat.