Huan, ni guk nung in Jesu’n Peter, Jakob, a unau Johante a tuam in tang sangtak ah a paitouhpih a. A ma uah a mel omdan a hong lamdangta a; a mai ni bang in a hong taang a, a puansilh te tuh vuk bang in a hong ngouta (Matt.17:1,2).
Hunlui a paikik thei a, khovel a thil tung sa tengteng enkik thei hilechin, bang na en dia? Pathian in, “Vak om hen” chia vak a siam laitak ahi diam, ahihkeileh Tuipi san kantan a Israelte a pailai uh? Ahihkeileh han akipan Jesu a thohkik laitak? Himahleh tang tung a Jesu’ mai ni bang a hong taang, a puansilhte vuk (vak) bang a a hong ngou lai kan a thupi a muhnophuai zaw a om diam?
Hiai mel lamdanna tang a Jesu’ mel om dan tuh Johan in Kilakna 1 a amuh dan toh tehkhakpih theih mahmah hi.
“Huan, kei hon houpih huai aw muh tum in ka kihei a. Huchia ka kihei aleh dangka-eng tuikuang koihna sagih ka muta a. Huan, huai tuikuang koihna lai ah kuahiam mihing tapa toh kibang, a khepek pha a puan silh, a awm khawng a dangka-eng gakna a kigak tuh ka muta hi. Huan, a lu leh a sam tuh samul kang bang in a kang a, vuk bang in; huan a mit tuh meikuang bang ahi; huan, a khe khawng tuh sumsan nawt tet bang ahi a, meipi a halsiang sa bang in; huan a aw tuh tui tampi ging bang ahi. Huan a khut taklam in aksi sagih a tawi a; huan a kam a kipan in namsau hiamtak hiamtuah a suak khia a; huan a mel tuh ni a sat sanlai bang ahi” (Kil.1:12-16).
Hunlui a paikik theilou i hihziak in nungzuite’n a muh bangbang uh kimu theilou hi. Himahleh hiai thute ngaihtuah zelzel hoih mahmah hi. Hiai hun nihte a i Toupa’ mel nungzuite’n a muhna a Pathian in a thugen (message) kibang a, huai tuh AMAH THU NGAI UN! chih ahi hi (Matt.17:5; Kil. 2:7, 11, 17, 29; 3:6, 13, 22).
Pa aw, ka Toupa uleh Hondampa uh thupina leh hatnate mu a ngaihtuah thei ding in hon panpih inla; huchia a thugente ngaihsak zaw sem thei din hon pi in.
Unaute zingpha. Tuni hun zatnuam chiat.