Mi’n keima ziak a hon tai ua, a hon sawi ua, zuau a gilou chiteng a a hon hek hun chiang un, na hampha uh. Kipak unla, nakpitak in nuam un; van ah na kipahman uh a thupi ngal a: tua mah bang in na ma ua zawlnei omte leng a na sawi nak uhi (Matt.5:11,12).
Midang toh kibanglou, chituam deuh a om kichi thil nuam hilou hi. Miteng in hon it in, lawm leh vual ten hon ngai le uh chih ki-ut chiat hi. Midang toh kituak theilou hih sangin mi toh kituak leh kihouthei hih ki-ut chiat hi.
Mi’n chihkhel, phengpi leh genhak hon sak ding uh lau a, i kim leh kiangte om dan leh chiindante a-om a awlsam mahmah hi. Midangte’n mihoih a ahon theih ua, ahon phat uleh ngaihsang uh hih ki-ut hi.
Himahleh Pathian in a lalgam sung ah huai dan hih gige theihna ding hamphatna hon pelou hi. A thupiak zui taktak ding ichihleh midangte’n hon pahtaklouh hun uh a om ding him ahi hi.
Hiai tuh Pathian mite a ding in a lamdang hilou hi. Zawlneite leng midangte’n ana deih in ana pom gige kei ua, a mite uh lak mahmah ah leng lungsim leh taksa a gelbawlna ana tuak sek uhi. Huaiziak in hinkhua haksa pipi ana zang sek uhi. Himahleh a tawpna ah a kipahman uh a mu zel uhi. En leng Pathian min a sawina leh haksatna neuchik i thuak khak omte ziak in kipahman i mu sam ding hi.
Pa aw, na thutak zumpih a midangte kiang a gen ngamlou a ka om louhna ding un hon panpih in. Na min ziak a haksatna ka tuah chiang ua ka kipah theihna ding un hon sinsak in.
Unaute Toupa’ ni zingpha. Tuni kikhop nuam chiat.