Ngai in, nungak siangthou a gai dia, tapa a nei dia, a min ding in Immanuel a sa ding uh, chi a na gen a hongtun theihna ding in huai tengteng tuh a hong om hi. Huai tuh, i kiang uah, Pathian a om, chih na ahi (Matt.1:23).
Mosi in a hun nanung a Israelte a vaikhakna ah hiai bang in ana gen hi:
Hiai dan leh thuseh tengteng za a; “Hiai nam thupi, a pil leh a theisiam mite ahi taktak uh” chi ding namte kiang a hiai in na pilna uh leh na theihsiamna uh lak ding a hih ziak in pilvang tak in hiaite zui un. I sap peuhmah chiang ua Toupa i Pathian in a honnaih bang a amau naihzel pathian nei nam thupi kua a om ua? (Deut.4:6,7).
Israelte’n amaute pilsak thei Pathian akipan dan a ngah kia uh hilou in, Pathian toh kizopna chituambik a nei uhi. Namdangte hichibang nei a om kei uhi. Van Pathian in amaute teeltuam in, hunkhe zel in, a ten theihna ding uh gam apia hi (Deut.4:32-40. A thumnate uh za in a dawng zel hi (2 Kro.7:15,16).
Thukhun Lui a Pathian in a mite chituamtak a ana kizoppih sang mah in tuni a Pathian toh i kizopna i ngaihtuah chiang in lamdang zaw lai hi. Pathian tuh mihing hong suak in mihingte lak ah hong teng a, i hatlouhnate thei a ahon hehpih theihna ding in eite mah bang in a hong khosa hi. I khelhnate ziak a hong si in, sihna akipan hon honkhia in Pathian lam i naih theihna ding lampi hon bawlsak hi (Heb.2:14-18; 10:19-22).
Unaute zingpha. Tuni hun zatnuam chiat.