Salmon in Rahab lak ah Boaz a suang a; Boaz in Ruthi lakah Obed a suang a; Obed in Jessai a suang a. Jessai in kumpipa David a suang. Huan kumpipa David in Uria’ zi lak ah Solomon a suang hi (Matt.1:5,6)
Tuni a i tangteel tuh Toupa Jesu khangthu ahi. Hoihtak a i ngaihtuah leh lunglut huai mahmah om hi. Numei thum gen khak in om ua, amaute tuh Rahab, Ruthi leh Uria’ zi ahi. Laisiangthou ah Rahab min giat vei genkhak in om a, huaite lak ah nga vei Rahab, kizuaknu chi a gen in om hi (Jos.2:1;6:17,25; Heb.11:31; Jak.2:25). Uria’ zi chia agen tuh Bathsheba ahi chih i theih chiat ahi; himahleh a min genlou in Uria zi hon chi chitchiat hi. David in midang’ zi a laksak ahi chih i theih deih sese ahi mai thei. Hiai gel ban ah a hoih lam a i theih mahmah, Ruth gen khak in om hi. Himahleh Ruth leng Israel mi hilou, Jentel numei, Moab mi ahi hi. Hiai apan i zil theih tuh Pathian in a thiltup a tangtunsakna ding in a ut peuh a zang thei a; khovel in a deihlouh leh nelhsiahte leng thil thupi hih buching ding in a zang thei hi. A hon zat ding in na kiphalna hia?
Unaute zingpha. Tuni hun zatnuam chiat.