Huan ka etleh ngai in, sakol kang leh atung a tupa thalpeu tawi ka mu a; amah kiang ah lallukhu piak in a-om a; amah vualzou a vualzou zou zel ding in ahong paikhia hi (Kil.6:2).
Kilakna laibu i et leh bung 5 ah Laibuzial Gakkipna Sagih a kigak gen in om a, bung 8 & 9 ah Pengkul Sagih om nawn a, bung 16 ah Tuikuang Sagih (Kuangkum/Belhbu – Bowl) gen in om nawn hi. Hiaite tuh a tuamtuam hilou in Khrist leh Setan, thutak leh zuau kidoutuahna a thiltung gendan tuamtuam a kigen ahi uhi.
Kilakna 6 tuni i tangteel ah Laibuzial Gakkipna Khatna phel ahih in Sakol Kang (Angou – white) hong pawtkhia in a tung a tuangpa’n Thalpeu a tawi chih i mu hi. A tung a tuangpa kiang ah lallukhu piak in a-om a; vualzou (gamla – conquer) a vualzou zou zel ding in ahong paikhia hi chih i mu hi.
Tuni i tangteel chet ah a tung a tuangpa kua ahia chih gen in omlou a, himahleh Kil.19:11 ah Khrist tuh vualzou a Sakol Kang tung a tuang i mu hi. Aman tuh dikna a vaihawm in kidouna a bawl chih i mu hi. Thutak melmate tuh Tanchinhoih thilhihtheihna toh zou in gamla (conquer) zel hi (Rom.1:16 cf.Eph.2:17). Kumzabi khatna hun ah Setan in a vanzat Rome kumpite tungtawn a ana dou mah le zoulou in tuni tanpha in hiai thutak melmate tuh Tanchinhoih thilhihtheihna toh zoh in om tou zelzel lai uhi.
Sakol Kang tung a tuangpa kiang ah lallukhu piak a om ahi chih i tangteel in hon hilh hi. Hiai lallukhu (stephanos) tuh gal a vualzoute kiang ah piak in a om zel hi. A gallakna vanzat genna ding in Thal tawi a muh in a om hi (cf.14:14; Sam 145:5; Hab.3:9,11). Huaiziak in tuni i tangteel a Sakol Kang leh a tung a tuangpa’n tuh Jesu Khrist in tatna nna hong sepna ziak a thutak melma Setan leh a nungzuite tung a gallakna, khalam kidouna a vualzohna leh vualzou tou zel ding ahihna hon lak hi.
Pathian khut taklam a Laibuzial Gakkipna Sagih toh kigak tuh phel ahih in a khatna ah Khrist leh anasepna in khovel pumpi zelsuak ahihdan toh hong kipan ngal hi.
Unaute sunnungpha. Tuni hun zatnuam chiat.