Belamnou in Gakkipna Sagihte lak a khat aphel lai ka mu a, thil hing lite lak a khat aw in, vanpiging bang mai in, “Hong pai in,” achih ka za hi. Huan ka etleh ngai in, sakol kang leh atung a tupa thalpeu tawi ka mu a; amah kiang ah lallukhu piak in a-om a; amah vualzou a vualzou zou zel ding in ahong paikhia hi (Kil.6:1-2)
Zan in unaute khat in video reel khat Sakol Kang, Sakol San, Sakol Vom leh Sakol Daang (Pale) chih toh kisai akigenna hon khak hi. A video ka et leh Sakol Kang pen Covid; tua i nawk lel pen Sakol San; 2027 chiang in Sakol Vom hong pai lai ding a; a tawpna ah 2030 chiang in Sakol Daang/Puang (Pale) hong om ding chi’n kigen hi.
Sakol Kang pen Covid ahi achihna ziak agenna ah Covid-19 lai a misi-te hi’n a hingte hileh a kang (ngou) ngen a kituam ahi, achi hi. Himahleh hiai tuh thudik ahi kei chih internet ah google lel lehang leng muh theih hi. Covid-19 lai a kizang PPE Kit (Personal Protective Equipment) pen a kang (white) om tham a, himahleh a kang hivek zenzenlou hi. Delhi khawng leh mun tamtak ah a blue kizatna tam mahmah hi. Misite tuamna ding in leng airtight plastic body bag pen a kang sang mah in khovel mun tuamtuam ah a vom kizang a, misi tuamna plastic bag rawng tuamtuam akang, avom, adum leh adangdang kizang hi. Huaiziak in hiai pansan a Sakol Kang pen Covid-19 ahi chih thudik hilou hi.
Hiai Sakol rong tuamtuam 4-te a kigenna tuh Kilakna 6 ahi. Kilakna 5 ah Belamnou (Jesu Khrist) in Laltutphah a tupa’ khut taklam akipan Gakkipna Sagih a kigak Laibuzial phel ding a chitna nei ahihdan i mu hi. Kilakna 6 ah hiai Gakkipnate hon phel a, huchiin Sakol rong tuamtuam leh a tung a tuang mi 4-te a hong pawtkhia hi. Hiai Laibuzial leh a Gakkipnate hong kiphel akipan a hong suakkhia thilte pen Zekariah 5 leh 6 ah muhlawk theih in ana om a; Pathian thangpaihna semsuahtu a vanzatte ahihdan uh leng a muhtheih hi.
Gakkipna khatna a hon phel leh Sakol Kang a hong pawtkhia a, a tung a tuangpa’n Thalpeu a tawi hi. A Kiang ah Lallukhu piak in a om a; gamla ding leh gamlatou zel ding in a pawtkhia hi chih i mu hi (Kil.6:1-2). Gakkipna Nihna a hon pheltak in Sakol San a hong pawtkhia a, leitung a kipan muanna lamang ding leh mite kithattuah sak di’n a kiang ah thu piak in a om hi. A kiang ah Namsau piak in leng a om hi (Kil.6:3-4). Gakkipna Thumna a pheltak in Sakol Vom a hong pawtkhia a, a tung a tuangpa’n a khut in Bukna a tawi hi (Kil.6:5-6). Gakkipna Lina a pheltak in Sakol Daang (Pale) hong pawtkhia a,a tung a tuangpa min Sihna ahi hi. Misikhua in a nung ah a zui in; namsau, kial leh gamsate zang a leitung a teengte seh-li suah seh-khat hih lum di’n thupiak in a om hi.
Hiai Sakol rong tuamtuamte leh a tung a tuang lite tuh Pathian’ angelte lak a thupi tungtuan lite’n a samkhia uh chih i mu hi. Huaiziak in Pathian vanzat ahi ua; a kiang ua thuneihna leng Pathian in a piak ahi chih i theithei hi. Amaute tuh Namsau, Kisimtuahna, Kial (Sum-Le-Pai Taksapna) leh Haksatna tuamtuamte a leitung mite gawt di’n thupiak in a om uh. Thukhun Lui hunlai a a thumanglou namte Pathian in a beisak zel bang in Kilakna laibu ah leng a tung a hel leh gilou Rome kumpite beisak ding in Pathian a kisata chih a hon theisak hi.
Huai sakol tungtuang mi lite pen a taktak a Rome khopi a sakol toh tai ding hilou in, chiamtehna mah ahi uhi. Hiaite pen Roman namte thalpaih a omna ding a nauvei natnate ahi uhi. A nawn chiang in a chiangzaw ah hiai Sakol tung tuang lite i en ding hi.
Unaute zingpha. Tuni hun zatnuam chiat.