Huan gamsa dang khat leitung a kipat a hong pawtkhetou ka mu a; belamnou bang in kii nih anei a, dragon bang in thu agen hi (Kil.13:11).
Kilakna 13:1-10 kikal ah tuipi apan hong pawtkhia gamsa i mu a, huai tuh Rome lalgam genna ahi chih i genta hi. Tuni i tangteel ah gamsa dang, leitung akipan hong pawtkhia muh in a om nawn hi.
Leitung apan hong pawtkhia hiai gamsa in belamnou bang in ki (horn) nih nei a, Dragon bang in thu gen a, gamsa masapen be ding in leitung a mite a sawl a (13:11-14), a be nuamloute hihlum a (13:15), huai gamsa chiamtehna neilou leh be nuamloute bangmah lei theilou leh zuak theilou ding in a bawl hi (13:16,17). Hiai gamsa tuh mundang a genkhak ahihnate ah zawlnei taklou chia gen in leng a om hi (16:13; 19:20; 20:10).
Hiai gamsa in belamnou bang a ki nih nei ahihna ah sakhua bang a kilatna (religious appearance) nei ding ahi chih hon musak hi. Dragon bang a thu gen a, gamsa masapen thuneihna zang ahihman in Setan vanzat mah, Rome kumpite thuneihna zang a nasem ahi chih muhtheih hi. Hiai ahihnate akipan in hiai gamsa tuh Rome kumpite thuneihna zang a nasem zawlnei takloute (paganism, false religion and emperor worship) a ensak chih i theithei hi. Kilakna laibu gelh hunlai a om khristiante a ding in bel hiai gamsa tuh kua ahia chih theihtel haksa hetlou ding hi.
Rome kumpi Domitian vaihawm hun in Rome lalgam sung, abiik in Asia gambup sung ah Rome kumpite biakna (emperor worship) a uang mahmah chih khovel khangthu ah i mu hi. Hiai sahkho thak sinsaktute tuh Rome kumpi in thuneihna sangtak a pia hi. Rome lalgam sung a mite peuhmah “Kaisar toupa ahi” (Caesar is Lord) chih pom ding leh pulak (confess) ding a hilh in a om uhi. Tuabang hih nuamloute nek-leh-tak, sum-leh-pai zonna a etkhiak (economic sanction) ahihban uah hihlup in leng a om zel uhi.
Hiai bang a khristiante sawina tuah tuh Johan kiang ah mengmuhna a lah in om a, tuni i tangteel in leng a hon lak hi. Hiai tuh Setan in Jesu Khrist a zohlouh tak a Khrist nungzuite kidoupih dia hong kuankhiak hun a anasep ahi hi. Himahleh khristiante’n i Toupa Jesu Khrist hatna zar a Setan zohna nei thei i hihman in khemna i tuah hun ah Setan kizousak kei ni.
Laisiangthou in michih amau utna a hip leh pimang a a-om chiang un khemna atuak uh ana chi a (Jak.1:14), himahleh khristiante i hamphatna tuh i thuak theihval khemna i tuah ding i Toupa’n hon phallou a, khemna i tuah hun ah leng i taikhiak theihna ding lampi hon bawlsak lai hi (1 Kor.10:13).
“Diabol dou un, huchi’n a hon taimang san ding hi” (Jak.4:7).
Unaute zingpha. Tuni hun zatnuam chiat