Dragon lian, gulpi tek, diabol leh Setan chih a ompa, khovel pumpi khempa leh amah nasem angelte toh van a kipan paihkhiaksuk in a-om uhi (Kil.12:9).
Tuni i tangteel leh Laisiangthou tang dang Is.12:12-15; Ezek.28:11-15 leh Lk.10:18-te Setan hong kipatna genna dan in mi tamtakte’n ngaihsun khial kha uhi (misapplied for the origin of Satan). Hiai Laisiangthou tangte hoihtak in a context en le hang van akipan a Setan satkhiak ahih thu gen hetlou uhi. Khalam kidouna Johan in mengmuhna a amuh dramatic tak a hong kigen ahia, a taktak (literal) a khovel dan a kidouna hilou hi.
Kilakna 12 tang bul akipan i sim suk leh Jesu Khrist hong pianma akipan leh hong piankhiak a Setan in nek zoh sawm a apanlakna i mu hi. Hong piankhiak a thahsawm a Herod khutzat a nei a naupangte thah ahihna thu leng i genta hi.Jesu Khrist hong pianma in Setan in khovel ana thuneihkhum a, himahleh Jesu’n hotdamna nasep a hon pat chiang in Setan thuneihna tuh satkhiak in a hong omta hi (Matt.12:29; Lk.10:18). Huchiin athu za a gingta a zuite tuh Setan thuneihna nuai ah om nawnlou uhi. Sihna akipan hong thohnawn a, van a apaitouh chiang in kumpi hihna la in khovel vaihawmna leh lalna tengteng a khenuai ah koih in om a, saptuam lutang a hong hita hi (Eph.1:20-22). Jesu’ nasep leh thilhihte peuhmah Setan satkhiakna ngentang a hong hita hi.
Leitung a Jesu hong sih a, a thohnawnna in leitung a Setan thuneihna a zou hi. Van a athuneihna tuh Jesu van a apaitouh a Pathian’ taklam a tu a alalgam tung a vai hon hawm akipan zoh ahita hi.
Kilakna 12 a Johan’ mengmuhna in Eden huan akipan Setan toh kidouna ana paitou den pen Jesu Khrist hong sih a, a thohnawn khit a van a paitouhna hun pen a phaktawp (climax) tung ahihdan hon lak hi. Hiai kidouna a Setan vuallel ahihman in a hihtheih om sun tuh huai nau tapa (Jesu Khrist) hon nei khia numei, Pathian’ mite gawt a (12:13), Pathian’ thupiak zuite leh Jesu’ thu theihpihte kidoupih ahita mai hi (12:17).
Kilakna 13 akipan a Setan leh a kaihzatamte’n Jesu Khrist nungzuite hon kidoupihna uh muh ding in hong om hi. Hiai kidounate tuh a taktak a khovel kidouna hilou in, khalam kidouna chiamtehna leh gentehna kampau hong kigen ahi hi.
Unaute zingpha. Tuni hun zatnuam chiat