Amei in van a aksite mun thum a khen mun khat akaikhia a, leitung ah apaikhia a; dragon in huai numei nau nei ding a kisa, aneih chiang a anau nek zoh tum in ama ah adingh hi. Ta pasal naupang, sikchiang a nam tengteng tung a vaihawm ding anei a; atapa pen Pathian leh alaltutphah ah laktouh in a-om hi (Kil.12:4-5)
Numei, ni a kizem, nau paai, nauvei leh suakkhe ding natna a kap leh nau a neih zoh chiang a nekzoh tum a Dragon a ma a dingh ahihdan i genta hi. Huchiin in numei ta pasal naupang, sikchiang a nam tengteng tung a vaihawm ding anei khia chih tuni i tangteel ah i mu hi. Sikchiang zang a namte tung a vaihawmtu Tapa tuh Jesu Khrist ahi chih i thei hi (Sam 2:7-9; Heb.1:5).
Numei suan a chi (seed) hong piang ding thuchiam (Gen.3:15) suksiat sawm in Thukhun Lui hun akipan Setan in pan ana latou den hi. Israel mipi tamzawte Pathian apan paimang ding in hun tamtak ah khemzou sek mahleh ginomtak a huai thuchiam khanggui ana kembit ding mi tamlou chikte ana omtou den uhi. Thukhun Thak ah leng nau pasal hong piang tuh nekzoh tum in pan ana la a, Herod in pasal kum 2 leh a nuai lam teng that ding in ana thuzoh hi (Matt.2:16). Jesu’n nasep a hon pat in leng a gingtalou Judate zang un thah ana sawm den a, himahleh Pathian’ thiltup a nasep zoh ma that zoulou hi. Huchiin a tawpna ah kross a kilhlum in vualzou dan in kilang mahleh, a taktak in a vuallelh ni ana hi zaw hi (Heb.2:14-15).
Unaute zingpha. Tuni hun zatnuam chiat