Huan tangsangte kiang leh suangpite kiang ah, Hon delhlum unla, amah laltutphah tung a tupa mai a kipan leh Belamnou thangpaihna a kipan hon sel un: A thangpaihna ni thupi hongtung hi; kua a ding zou dia? a chi uhi (Kil.6:16,17)
Kilakna bung 5 ah Gakkipna Sagih a kigak Laibuzial hong ding a chitna nei Belamnou (Jesu Khrist) kia ahi chih i mu hi. Huai Laibuzial ahon lak tak in lei leh van leh tuipi sung tanpha ah phatna thupitak a om chih i mu hi.
Bung 6 ah Gakkipna Sagihte lak ah Gakkipna Guk Belamnou in a hon phel hi. Gakkipna masa 4-te abanban a ahon phel tak in Sakol Kaang, Sakol San, Sakol Vom leh Sakol Daang a hong pawtkhia uhi.
Gakkipna Ngana a hon phel tak in maitam nuai a tu Martyr a si-te’ khate John in a mu hi. Amaute tuh Jesu’ thu theihpihna ziak a hihlup a omte ahi ua, a kiang uah puanngou piak in a om uhi. Amau dotna poimoh tak “ka sisan phu uh bang tan laklouh a koih ding na hia?” chih a hon dong ua, huchiin amaute bang a thah a hong om lai ding a unaute uh sawtlou ana ngak tadih ding a hilh in a om uhi.
Martyrte’n dotna poimoh tak a hon dot khit nung un Belamnou in Gakkipna Gukna a hon phel a, huchiin Zinliing thupitak a hong om a, Ni a hong mial gai a, Khapi sisan mah bang in a hong om a, Vaan aksite hong pulhkhia uhi. Huchiin leitung a teng mite lauhna toh kidim in kawlhawm leh suangpi pang khawng ah a bu ua, mualte kiang ah hon liah un chi’n a kikou uhi. Hiai gakkipna gukna a kizang thumalte i et leh Thukhun Lui hun a namte beina ding a chiamtehna kizangte ngen ahi uhi (cf.Isa. 2:12-22; 13:9-16; 34:14; Hos.10:8; etc).
Thukhun Lui hunlai a a thumanglou namte Pathian in a beisak zel bang in Kilakna laibu ah leng atung a hel leh gilou Rome kumpite beisak ding in Pathian a kisata chih a hon theisak. Martyrte’ dotna, “bangchik chiang a ka phu uh la ding” chih dawnna pen Gakkipna Gukna ah latsak in om hi.
Pathian in Amah dou Roman namte leh kumpite ana sukbeitak mah bang in, tulai in leng Amah dou namte leh thuneite tung a khovel tawp chiang a thukhenna kia hilou a, leitung a leng phu la thei ahi chih i mu hi. Pathian in a tate thuakte a theilou ahi het kei hi. Khristiante tuh i ginom nak leh khovel ah vuallel bang in kilang mah lehang, vualzou a puanngou silh a i om hun om ding hi.
Gakkipna Sagihna leh a tawpna phel ahihma in Pathian in a sepkhiak masak nop om a, huai tuh bung 7 ah muh theih hi. Huai sepzoh a hih phet chiang in Gakkipna Sagihna phelkhiak in a hong om dia, huai ah Toupa’ thangpaihna chi tuamtuamte mutkhiak in a hong om ding hi.
Unaute zingpha. Tuni hun zatnuam chiat