Hiai thilte nung a ka etleh, ngai in, van ah kongkhak akihong a; ka aw zak masakpen pengkul aw ging bang in kei ahon houpih hi, “Hiai ah hong paitou in, huan tunung chiang a thil hong om dingte ka hon musak ding,” achi hi. Thakhat in Kha in ka om pah ngal a; ngai in, van ah laltutphah ahong kitungta a, laltutphah tung ah mi khat atu hi (Kil.4:1,2).
Kilakna laibu tuh Patmos tuikulh a Johan kiang a Jesu Khrist a kilakna ahi chih i genta hi (1:1,10). Toupa’ ni a kha a a-om lai in aw ngaihtak pengkul ging mai in amah houpih in Saptuam Sagihte kiang a alaikhak ding a hilh hi. Hiai Saptuam Sagihte dinmun tuh leitung a Toupa’ saptuam koimun peuh a omte dinmun ahihban ah amau sik-leh-tang in a kizang hi.
Bung 3 tan ah Saptuam Sagihte kiang a laikhak ding a hilh zouta a, huchiin a aw zak masakpen mah in “van ah hong paitou inla, tunung chiang a thil hong om dingte ka hon musak ding,” achi hi.
I gentaksa mah bang in Johan in Kilakna a gelh hun a khristiante tuh Rome kumpite akipan mulkimhuaitak a soisak leh thahna, zekhemna leh gimthuakna tuamtuam tuakte ahi uhi. Amau tuh Pathian lalgam, a saptuam in hiai kumpite doudalna a thuak mualsuah zou ding adiam chia lungdontak a omte ahi uhi.
Huchiin Patmos tuikulh a Johan om lai tuh sapna aw a zaktak in kha a om in van a Pathian alaltutphah tung a tu a musak in a omta hi. Huaiziak in Pathian in khovel thuneihna tengteng tawi a vaihawm lel ahihdan bung 4 leh bung 5-na ah lah in a hong om hi. Maban a athil tuahtouh zel dingte ua leng Pathian’ lalgam tuh vualzou zel ding ahihdan muhsak a hong hita hi.Hiai Pathian’ laltutphah omna mun leh huai a thil omte tuh zawlnei Ezekiel in kum 700 vel paita ana muta a, huaiziak in Kilakna 4 leh Ezekiel 1 in kibatna mahmah a nei uhi.
Kumzabi khatna khristiante lungkham, lungdong leh mangbangtak a a-om lai ua Pathian in khovel tengteng tung a vaihawm a thuneihna nei ahi chih atheihchetna un lungmuanna leh tawldamna a piak bang in en leng hiaite mah theihchiang semsem ding in Laisiangthou sim pibawl ni.
Unaute zingpha. Tuni hun zatnuam chiat.