Na thilhihte ka thei, lum lah lum lou, vot lah vot lou in na om a; na lumleh lum inla na votleh vot vanglak in! Lum lah lum lou, vot lah vot lou a na om pelhpulh ziak in, ka kam a kipan in ka hon sekhe ding hi (Kil.3:15,16).
Laodicea khopi tuh Hierapolis le Kolosa khopi toh thukthum bang a khopi kizom ahi chih i genta hi. Kolasa khopi pen Cadmus Tang (Mount Cadmus) bul Lycus lui phaizang a om ahihna ah Tang akipan tuivot leh siang kilkel hong luangte nei hi. Alehlam ah Hierapolis khopi ah tuisam lum (hot spring) om a, huai tumsam lum tui tuh damtheihna ding in hoih mahmah hi.
Laodicea khopi pen khopi hausa mahmah ahihhang in tuinek petu ding nak (water source) kizentak omlou hi. Huaiziak in a tuinek ding utuh Kolosa akipan tuivot leh Hierapolis akipan tuilum a la uhi. Tuilum pen a bultung a hoih a damtheih huai lua hinapi Laodicea hong tan hong tun chiang in lum lah lumlou, vot lah votlou in om pelpulh a, a tuilakna lampi Lycus lui phaizang akipan mineral tampi toh hong kihel in mihing dawn ding in damtheihna huai nawnlou in, a lim leng lim nawnlou hi.
Laodicea khopi’ tuilakna mah pansan in Jesu Khrist in hiai khua a saptuam tuh khalam a leng huai dinmun mah ahihdan uh agen hi. Jesu’n a lamkhiak saptuam pen khalam damna mun himahleh tuni tangteel a i muh mah bang in Laodicea saptuam tuh damna hilou in kihdak huai lel dinmun a ding uh ahihdan i muthei hi. Saptuam tuh Pathian’ thutak khum leh kingakna ding hina zenpi (1 Tim.3:15); Laodicea saptuam bel ngaihkhawklouhna (indifference) in tuumchip a, leitung hauhsaknate’n ihmu sak in khalam ah mantheihlouh dinmun in a om uhi.
Kilakna 1:20 i genna ah saptuam’ angel tuh saptuam sung a sawltakte, upate leh tualsung saptuam enkoltute ahihdan i genta hi. Laodicea saptuam kiang a laikhak leng saptuam’ angel kiang a khak ahihna ah tuni a tualsung saptuam enkoltu tuamtuamte’n leng Pathian’ in a sisan a alei (Nas.20:28) saptuam i etkolna ah Jesu’n i etkol saptuam bangchi’n a mu dia chihte kivelthak gige poimoh a, Pathian’ thutak ngaihkhawkna mah toh pan i lak poimoh hi.
Unaute zingpha. Tuni hun zatnuam chiat