“Na thilhihte ka thei, ngai in, na ma ah kuamah khak theih louh kong honsa ka koih hi; thilhihtheihna neuchik na nei a, ka thu na kem a, ka min na pai (denied – kitheihmohbawl) kei hi (Kil.3:8).
Kilakna laibu a saptuam sagih kigente lak ah Philadelphia leh Smyrna kia in Jesu Khrist apat demna mulou uhi.
Tuni tangteel a i muh bang in Philadelphia saptuam in khalam nasepna ah Jesu’n, “na ma ah kuamah khak theih louh kong honsa ka koih hi” achi hi. Philadelphia tuh i gentaksa mah bang in Grik pau puangzaktu dia khopi kibawl ahihziak in hiai khua a saptuam mite a ding in Judate kiang kia hilou in namdang tuamtuamte kiang ah Tanchinhoih gentheihna kong lianpitak a kihong hi.
Himahleh “thilhihtheihna neuchik na nei a” achih bang in khovel etdan a saptuam hat leh khovel thilte a hausa a midangte thuzohzou ahi kei chih i mu thei hi. Hiai thumal in khalam gen hilou in, khovel etdan a hat leh hausa ahihlouhna gen ahi zaw hi. Philadelphia leh Smyrna khua a saptuam chihlouh khopi nga a om saptuam dangte i etna ah khovel et a hatlua, piching leh noptuak lua a bang uhi. Himahleh Pathian deihdan hilou akiim-akiang ua kipan amuh uh saptuam sung a apuaklutte uh hat leh piching a kisaknate mah uh Jesu Khrist demna pipen ahi chih i gensate apan muhtheih hi.
Saptuamte tung a Jesu Khrist kipahna tuh Philadelphia saptuam mah bang a athu i kepbitna ahia; mahni hoihsak dan a kihihphurna leh nopsaknate hilou zaw hi. En nuam i sak a, thanuamtak leh phurtak a ihih chiang a Pathian le ana kipak mai didan a ngaihdan mihing lungsim ah om baih mahmah hi. Hiai mah tuh ikiim-ikiang a pawl bawltawm tuamtuamte paikhelhna bulpi ahi. Khovel etdan a kilawm leh felhuai lua le ahi mai thei; himahleh Laisiangthou i muhtheihlouh biakna leh nasepte tuh saptuamte thilhih didan hilou hi.
“Khrist saptuam in Khrist thu zui hi; a daihna ah kou leng dai ung, a pauna ah kou leng pau ung” chia la a i sak mah bang in tuni a saptuamte’n i thilhihte leh nasepte koi Laisiangthou ah a kigelh a, koi ah akimu a chihte kivelchian thakthak ding i kingen hi.
Philadelphia saptuam mah bang in Pathian thutak kembit, amin kitheihmohbawl lou tualsung saptuam hi chiat thei din Pathian in hon vualzawl hen.
Unaute zingpha. Tuni hun zatnuam chiat