Na thilhihte, na gimthuak dan leh na zawn dan, himahleh na hau hi, Judate hiloupi, ahi a kigen Setan kikhopna innte Pathian gensiatna ka thei hi. Na thuak pah ding thilte kihta ken; ngai in, ze-et a na om theihna ding un Diabol in na lak ua a khente suangkulh ah honkhum pah ding; ni sawm sung gimthuakna na nei ding uhi. Sihpha in ginom in om in, huchi in hinna lallukhu k’on pe ding hi (Kil.2:9-10).
Tuni a i tangteel in Smarna khua a khristiante tuh gimthuakna leh sawina tuak lellel uh ahihdan hon lak hi. Himahleh a thuakna uh Jesu’n a theichian mahmah hi. Smarna saptuam tuh salam thil a genthei mahmahte ahi ua, himahleh khalam a hausa mahmahte ahi uhi. Pathian in a saptuamte hon kipahpihna pen salam thil a i hauhsak ziakte hilou in, khalam a i hauhsakna ahi zaw hi. Himahleh tulai saptuam tampite’n saptuam hat leh hatlou i tehna tuh salam thil, sum-leh-paite hi kha pahpah sek hi.
Tuni i tangteel mah in Smarna saptuam tuh ze-et a a-om theihna ding ua ni sawm sung gimthuakna nei ding uh ahihdan hon hilh hi. Ni sawm kichi tuh gentehna kampau ahia; hun sawtlou himahleh nakpitak a sawina hun genna ahi. Hiai sawina tuh khristiante ginna ettelna dia thiltung ahi chih i mu hi. Sawina leh haksatnate pen khristiante’n i tuah ding mah ahihdan i Toupa Jesu mahmah in a damlai in ana gen hi (Jn.15:20-21).
Khristian hinkhua tuh kitaitehna hinkhua bang ahi a (1 Kor.9:24-27); a vualzoute’n lallukhu amuh bang un, sih tanpha a ginomte i Toupa’n hinna lallukhu hon chiam hi. Huai tang thei chiat ding in unaute kuapeuh kisa ni.
Unaute zingpha. Tuni hun zatnuam chiat