Himahleh hiai thu ah na hoih, Nikol pawlte thilhihte na hua a, ken leng huaite ka hua hi (Kil.2:6).
Ephesa Saptuam tuh Jesu’n a itna masa a tawpsan thu ah demna nei mahleh Nikol pawlte thilhihte a huatna ah a pahtakna tuni i tangteel ah muhtheih hi. Pergamos saptuam in hiai Nikol pawlte a ompih ziak in demna a nei hi (Kil.2:15)
Laisiangthou mundang ah Nikol pawlte toh kisai gentam khak in om hetlou hi. Himahleh Church Father-te laigelhte apan a sinsakna ubel muhtheih hunkhop om hi. Irenaeus (c AD 180) leh Hippolytus (c.AD 200-230) te’n hiai Nikol pawlte tuh Nasepte 6 a mi sagih telkhiak a omte lak a Antiok khomi Nikola in a patkhiak sinsakna diklou zuite ahi chi ua, himahleh Clement (c.AD 195) in bel Nikola gum in, a nungzui kichite’n a sinsakna a theihkhelh ziak uh ahi, chi hi. Eusebius (c. AD 325) in leng Nikola min zang a pawl kibawl sinsakna diklou sinsakte ahi uh, chi hi.
Nikol pawlte’n tuh khristiante khovel thanghuaina a kibual ding a noplenna nei chi in milimte kiang a kithoihna thilte ne ding leh numei-pasal kal a thanghuaina hih ding in mite a sinsak uhi. Hiai bang sinsakna Ephesa saptuam in a huat ziak in Jesu’n a pakta a, Pergamos saptuam in khawk a saklouh ziak in a dem hi.
Tuni’n leng Toupa’n a huat zawlnei takloutebleh sinsakna dikloute i ngaihneu leh mohpaihna i tuak ding hi.
Unaute Toupa’ ni zingpha. Tuni kikhop nuam chiat