Huan, Abraham a dak a, a en a, huan, ngai in, a nunglam ah belampa a ki a singbawka awk a na om a: huchi’n, Abraham in belampa a va man a, huai a tapa sik in halmang a pumpiakna ding in a lan zaw ta a. Huchi’n, Abraham in huai lai mun min di’n Jehova-jire a sa a: tuni tan in, Toupa tang ah ngaihtuah hi na ve, a chih zel bang un (Gen.22:13,14)
Na tapa neihsun kithoihna a laan ding in Pathian in hon ngiat leh na lungsim a bang om din na gingta a? Pathian’ hoihna ginlelh baihlam mahmah kha ding hi. Abraham in bel Pathian ah muanna kiptak nei in, zingkal baihtak a thou in a tapa laan ding in Moriah zuan in ni thum apai ngal hi. A tapa Isak in, “Pa, mei leh sing lah a om a; himahleh halmang a pumpiakna ding belamnou la koi a om ahia?” chia dotna a bawl lai in, “Bawi, Pathian in amah a ding a halmang a pumpiakna ding belamnou a ngaihtuah tawm na ke” chia dawng in Pathian thupiak a zuih ding a tawpkik tuan kei hi. Ei dinmun ding in ngaihtuah lehang, tamtak kitawpkik ding in ka gingta hi. A ginna thupi hina tel e maw!
Haltum thillat a si ding lai Isak tuh Pathian in belam zang a ahutkhiak mah bang in ei leng Pathian Belamnou, i Toupa Jesu in si ding lai a hon tankhia hi. Eimah bang a mihing a hong khosa ahihman in a sih ding lin mahmah sam ahi ding a, Gethsemani huan ah, “Pa, ahihtheih liai leh hiai nou in hon pel mahmah hen” chi’n a thuum ngoihngoih a, huai kia leng hilou in kross ah haksa satak in a-om hi. Himahleh a hon it mahmah ziak in, “Pa, kei thu hilou in, nang thu hi zaw hen” achi lai hi. I Pathian un hon it hina tel e! A tapa sih ding a phal hi. I phulou hiai bang itna i tante ziak in a tung ah kipahthu gen in a min phat ni.
I kim leh kiang thute ziak khawng in a kal laklak ah Pathian’ thupiakte ahi bangbang a i zuih ngamlouh hun om thei hi. Hiaite tuh hichikhaleh, huchikei khaleh chih i lauh ziak bang hi nuam hi. A thupiakte ginglel hetlou in zuingam peuh le hang Pathian in ngaihtuah mahmah ding hi.
Toupa’n ngaihtuahna ve! Toupa’n hon pe na inte! A thupiak zui peuhmah phot ni.
Unaute zingpha. Tuni hun zatnuam chiat