Mi genhakte, lungtang leh bila zeksumlouhte aw, chiklai peuh in Kha Siangthou na dal gige uh; na pipute uh hih bangbang in na hih nilouhlouh uh. Na pipute un zawlneite lak ah kua ahia a sawi louh uh? Mi Diktak hongding thugen kholte a hihlum ua; huai Mi Taktak tuh mansakte leh thatte noumau tu in na hi uhi (Nas.7:51,52).
Stephen hinkhua i et leh sawt hetlou hi. Saptuam sung niteng thilhawm ziak a buaina hong om ziak in kha leh pilna a dim mi sagih hon teelkhia ua; Stephen tuh huai a telkhiakte uh lak a khat ahi. A thugenna ah Judate heutute diklouhna gen in migenhakte, lungtang leh bil a zeksumlouhte, Khasiangthou daltute, Zawlneite sawitute chi in hangsantak in a maitang uah gen ekek a, huchiin a sermon masapen tuh hon sih pih ngal hi. Nungzuite lak ah martyr masapen a suak hial hi. Thudiklou leh thil dikloute tangkoupih a gen kichi thil nuam ahi kei a, hinna tanpha adia lauhuai thil ahi thei hi.
Ni tamlou paita a America a kaplup a om Charlie Kirk bang a khalam dinmun thu tuam hileh, a gamsung uleh khovel pumpi adia le deih huailou, Laisiangthou kalh gamtatna tampite hangsantak a tangkoupih in sihloh hi. A pammaih a a-ithuai kia hilou in, taksa a leng naupang chik a hih lai ziak in si baih lua sak in a om hi.
Tuni a i tangteel a i muh Stephen bang Pathian in tom zanglua sak in a om hi. Himahleh a ma thilguan buchingzaw sung ah Stephen panna tuh a lian mahmah hi. Sawltak Paul hangsanna leng Stephen sermon khat a zak khak, suang a denlup dek a a-om lai a ahangsanna amuh ziak leng ahihkhakna tan om din gintakhuai hi. Stephen hinkhua hi a thawn hi hetlou hi. Pathian adia i kizat a sawt leh tom thu hilou in, i kizat sung in chitak leh hangsantak in i pang na hia chih Pathian et ana hi zaw hi. I hinkhua sawt leh tom sang in i hun neih sunsunte Pathian thupina din i zangkei kha ding chih lau in, kuapeuh thathak le in kisathak chiat ni.
Unaute Toupa’ ni zingpha. Tuni kikhop nuam chiat.