A neih bang un, ahi, a neih bang sa’ng ua thupi’n leng, amau thuthu un a pia uh chih theihpih ka hi, Hiai hehpihna leh misiangthoute nna sepsakna thu a nakpitak a hon ngen ngutngut in. Huai leng ka lamet louh bang un ahih ua, Pathian deihlam in, amau mahmah Toupa kiang ah leh kou kiang ah a kipe masa phot uhi (2 Kor.8:3-5).
Masidonia leh Achaia gam a saptuamte’n Jerusalem a kial panpihna hon khak utuh 1 Kor.16:1 ah Paul in, “misiangthoute adia thohlawm” ahi achi a, tuni i tangteel in hehpihna leh misiangthoute nna sepsakna ahi achi hi. Hiai thilpiak tuh Jerusalem a misiangthou tengteng a ding leng hilou in, “misiangthoute lak a gentheite a ding” chih ahi sawn lai hi (Rom.15:26). Hiai thilpiak a kigenna khempeuh ah misiangthoute a ding ngen agen in a om hi.
Masidonia leh Achaia gam a saptuamte’n a neih sang mah ua leng thupizaw a thilpiak hon piak theihna ziak utuh Paul in ahon genna ah, “Toupa kiang ah leh kou kiang ah a kipe masa phot uh” achih tuni i tangteel ah i mu hi. Pathian’ nasepna leh thil piak lam a i hat zohlouh ziak tuh Pathian leh sawltakte sinsakna leh thuhilhna a i kipiakkhiak masak louh ziak hi kha ding hi.
Unaute zingpha. Tuni hun zatnuam chiat.