Huan, Jesu len te’n nuihzabawl na’n a zang ua, a sat ua, Huan, a mit a tuam ua, Gen in, kua ahia hon sat? chi’n, a dong uh. Huan, thudang tampi’n leng a gensia un a kou uh (Lk.22:63-65).
Tuni a i tangteel mitkha a mu kawm a i sim leh mulkimhuai mahmah hi. Hiai dan chet thil tung a taktak ah ka mit in mukha ngei kei mah le’ng WhatsApp video tuamtuam khawng ah kithahna leh kisawisakna video tuamtuam ka en kha sek hi. Hun tamtak ah a thuaktute’n thuak taak mah le’ng ahi kha ding ua, himahleh bang ziak a mihing khat in amah bangbang mihing khat mah mulkimhuai tak a sawisak nuamsa thei ahi de aw chihte theihsiam haksa kasa mahnah sek hi.
Himahleh tuni in hiai dan a sawina thuaktaak mihing tungtang gen ihi kei hi. Jesu bel “midangte tung a thilhoih hih a vialvak mi” ahi hi (Nas.10:38). Lungsim kitamkhamte a khamuan a, mite nelhsiahte a don hi. Naupangte a it a, mi gentheite kiang ah leng kipahna thupha a tangkoupih hi. A melmate na san it in, hehpih in nna a sem hi.
Hiaite sang mah a le ngaihtuahna hon khoihkha tuh Thil Siamtu in a thilsiamsa te’n hiai bang a abawlsiatna ding ua a kipumpiakna ahi. Thuuktak in ngaihtuah mah dih! I Pathian zaw mihing ngaihtuahna lel toh kitheisiam zoulou hi maw!
Ka Pathian uleh koute hon Siampa aw, ka kipahna uleh kon itna uh bang ka genta ding ua? Ka phu het kei uh! Na ma a hong kuun in kon bia uhi.
Unaute zingpha. Tuni hun zatnuam chiat.