Huan, a tawp in a gil a hong kialta a. Huan, diabol in a kiang ah, Pathian Tapa na hih leh hiai suang tanghou suak di’n thupia in, a chi a. Huan, Jesu’n a kiang ah, Mihing tanghou kia in a hing kei ding, chih gelh ahi, a chi a, a dawng hi (Lk.4:3,4).
Mihing in niteng in an kine a, alou-theilou leng ahi. An nelou hile hang i bah ding a, atawp in i si ding hi. An tuh i hinna ding in a poimoh mahmah hi.
I Toupa Jesu gamdai ah an nelou in ni 40 sung a om hi. Tuni i tangteel tuh hiai hun a Setan in an a nek theihna ding toh kisai a khemna a dawnna ahi.
Ni 40 sang a tawm zaw tham, kal khat sung lel an nelou a, ngawl ding a ka kingaihtuah chiang in zou ding in ka kigingta kei a, hiai huntak a ka poimoh pen an hi ding in ka kigingta hi. Himahleh i Toupa Jesu bel an sang a a poimoh ngaihzawk Pathian’ thu a om hi. A hinna ahi a, tanghou sang in a manpha zaw hi.
Tanghou tuh ut leh utlouh a tel theih (optional) thil ahia, himahleh Pathian’ thu bel ahi kei achi hi. Na lungtang teng toh ngaihtuah mah dih!
Pa aw, ka niteng nek ding uh non piak ziak in kipahthu kon gen uhi. Huai sang mah in leng, na thutak ziak in ka kipak uhi.
Unaute zingpha. Tuni hun zatnuam chiat.