Huai hun chiang in, mi diktatte’n, Toupa, chik in ahia gilkial a k’on muh ua nek ding k’on piak uh? dangtak a k’on muh ua, dawn ding k’on piak uh? Chik in ahia mikhual a k’on muh ua, k’on zintun uh? vuaktang a k’on muh ua, puan k’on silhsak uh? Chik in ahia china in hiam suangkulh ah hiam k’on muh ua, na kiang a ka hong uh? chi’n, a dawng ding uh. Huan, Kumpipa’n a kiang uah, chihtaktak in k’on hilh ahi, Hiai ka unau neupente lak a mi khat tung a na hih uh tuh, ka tung a hih na hi uh, chi in, a dawng ding (Matt.25:37-40).
Jesu’n mi tengteng, azawng-ahau, ahai-apil aneu-alian itdan kibang in hon it vek hi. Khamtheih hihte, kizuakte, vual phaloute, zudawn zongsangte leh lungsim vengloute leng midangte toh itdan kibang in a it hi.
Amaute Toupa’ ni biakna bang ah hong vak lut in hong kikhawm hile uh bang i na chi muh dia? Houpih taaklou chi in i enliam maimah diam? Ahihkeileh a min uh ana dong in Pathian be ding a hong pai uh kipahpih ihi chi in i kiang a hong tu ding in i na zawn diam? Amau leng it mahmah a, asik leh tang ua si i Toupa thu genpih taak in i sim diam? A khelhnate uh ngaidamna ding om ahihdan leh lametna nei lai uh ahihdan i na genpih ut diam?
Ahihkeileh daikil kal a unau khat, kikhawm ngeilou hong kikhop sunsun chiang in theihtham (recognise) i sa hiam? Kisuanglah lou leh maingal tak a hong kikhop zom zelzel theihna din bang siamna i na suah a?
Biakin tamtak leh saptuam (congregation) tamtak ah i Toupa Jesu Khrist phawkphak leh ngaihsak phak a om nawnlou ahihkhak ding lauhuai mahmah hi.
“Hiai ka unau neupente lak a mi khat tung a na hih uh tuh, ka tung a hih na hi uh.”
Pa aw, ka lungtangte uleh ka mitte uh nang be ding a hong pai peuhmahte a ding a ana hong thei din hon panpih in.
Unaute nitakpha. Kuapeuh mangpha leh ihmut lim chiat.