Nou sem gim leh puakgik po tengteng aw, ka kiang ah hong pai unla, keiman khawlna k’on pe ding. Ka hakkol pua unla, kei a kipan zil un; thunuailut leh lungtang a kingainiam tak ka hi; huchi’n, na kha ua ding in khawlna na mu ding uh. Ka hakkol a nuam a, ka puak leng a zaang ahi, a chi hi (Matt.11:28,29).
Tuni i tangteel ah Jesu’n semgim leh puakgik pawte a hakkol puakpih ding in a chial hi. Hakkol (yoke) tuh ganhing nih in nna a sepkhawm theihna ding ua a ngawng ua zopkhawmna sing kisutuah ahi. Jesu’n a hakkol puakpih ding a hon chialna thilnih in et theih hi.
Khatna ah, a hakkol tungtawn in khawlna hon penuam hi. Khelhna puakgik giktak i puakte lakhia a, Khrist in a hakkol puaknuam leh zaangkhai tak tung a ngak theihna hon pia hi.
A nihna tuh Jesu apan i zil theihna ding ahi. Ganhing naupang zawte tuh nasep dan sinsakna in a upa zawte toh hakkol puakkhawmsak in om zel hi. Jesu toh a hakkol a i kikhihkhawm chiang in Amah gamtat dan a tat ngai a, Amah akipan kizil thei hi.
Himahleh hiai hakkol tuh thagum a i tung a hong kipawsak ahi kei a, en eimah ut thu a i puak ahi hi. Khenchiang in i mihing hihna in hiai hakkol deihlou in lakkhiak utna hon pesek hi. Hiai hakkol polou a i sa utna dandan a khosak nopna i neih hun om kha sek hi.
Ahihhang in hiai hakkol i lakkhiak nini in Jesu Khrist i zotma a i kipatna mun mah i tungkik zel a, ama a i sepgimna leh puakgikte mah pua in hinkhua i zang nawn hi.
Tuni a i puak bang hakkol ahia chih mimal ah kidong chiat ni.
Pa aw, kou leh kou kimuanglou a, Nang kon muan theihna ding un hon panpih in. Na hakkol pua a nang apan zil thei ding in hon panpih in.
Unaute zingpha. Tuni hun zatnuam chiat.