Aw Assuria kumpipa, na belam chingmite a lusu uhi: na mi liante a khawl ua: na kipite tangte khawng ah a dalh khin ua, pikhawmmi kuamah a om kei uh. Na natna damna sing a om kei; na liamna a thupi mahmah hi: na husa zapeuh in khut a hon betkhum ua; na gitlouhna in a tup gige louh kua a om a? (Nahum 3:18,19).
Tuni a i tangteel tuh Nahum laibu tawpna ahi. Pathian hotdamna ding thuchiam muh in a om kei a, a hehna pelh theihna dia kisik ding a thupiak leng a om kei hi. Maban ah leng lametna a om chi het kei hi.
Hiai Nahum laibu tawpna leh Jonah laibu tawpna a kilehbulh mahmah hi. Jonah in Ninevi mite kiang ah kisikna thu a gen a (a lungsim taktak a gen hi khol kei mah leh), mite a kisik ua, Pathian zahngaihna a mu uhi. Pathian in Jonah leh midangte kiang ah a zahngaihna mi teng tung a thuuk (deep) mahmah leh kiningching mahmah ahihdan a lak hi.
Himahleh Nahum laibu ah Pathian thuakzohna in mi chihkhelh, athupiak nelhsiah teiteite tung a phakchiam (limit) nei ahihdan muhtheih hi. Hehpihna hau ahih bang in mi diktat (just) leng ahi hi. A hehpihna leh a itna tuktuk in a diktatna leh hehna leng a bukim hi. Khelhna tung ah a dohzou den kei a, a thupiak zui utloute tung ah vaihawmna leng a bawl khum teitei sek hi.
I mimal hinkhua adia i zil theih om hi. Pathian i tung ah a dohzou a, himahleh i tung a adohzohna in phakchiam (limit) nei thei hi. Ninevi mite akipan sinlai la in, Pathian’ dohzohna ngaineu lou in, kisik in Amah kiang zuan le hang, chiklai peuh in Aman honna ngaihsak gige hi.
Unaute zingpha. Tuni hun zatnuam chiat.