A lupna tung ua thulimlouhna gelmite leh thil hoihlou ngaihtuah khemite a tung a gik hi: zingsang a khua a vak in huai lah a hih zel ziak in (Mika 2:1).
Thil hoihlou tamtak i lungsim a om, ahihziak a hun lemtang i muh louh ziak a i hihbuchin louh om sek hi. Huai kia hilou in, a hoihlou ahi chih theinapi a leng i etlah, ahihziak a i neih zohlouh ziak a i neihkhak louh leng om lai hi.
Internet khawng a hong om akipan i neih zohlouhte kiam hulhul a bang hi. Internet tungtawn a i muh theih zahmoh thanghuai, internet om ma a i muhbat louh ding, tuni chiang in i khutmuk a mekpawt theih hita hi. Hiaite tengteng in i theihlouh kal in i ngaihtuah sunin in subuah thei hi.
Internet in sum tah a kimawl zongsangte (gambler), gutate leh kigensiatna ding mun lemtang tak a bawl kha hi. Hun tamtak ah social media-te kidemtuahna leh kigensiattuahna mun a bang phial hi.
Facebook leh social media tuamtuam tungtawn in midang toh kizoptuahna leng om thei hi. Insung hiam, nupa kal hiam a lungkim louhna neite’n lawmluite toh baihlam tak a kithuzak thak kik in lampi bawlthak theihna hon pia hi. Hiai i zalennate’n a hoih lam sang in aselam a haina hon tun baih mahmah hi.
I Toupa Jesu’n hiai ana gen hi: “Kuapeuh numei khelhpih utna toh en tuh, a lungsim in ang a kawm khinta chih k’on hilh ahi. Huan, na mit taklam in a hon hihpuk leh, khel khia inla, pai mai in, na sapumpi a Gehenna a pai sa’ng in na sapum a ka khat manthat nang a ding in a hoih hi” (Matt.5:29,30).
A buaihuai pen tuh i lungtang sung a ngaihtuahna om pen ahia, internet hiam ahi zaw kei hi. Khelhna tuh i lungtang ngaihtuahna a hong kipan masa ahi hi. Huaiziak in i kivenna ding in leng hiai apat mah i pat a ngai hi.
Pa aw, ka lungtang uh hon siangsak in.
Unaute zingpha. Tuni hun zatnuam chiat.