Ahihhang in, huai in Jona a lunghisak het kei a, a heh hi. TOUPA kiang ah a thum a, AW TOUPA, k’on ngen hi, hiai ka gam ua ka om lai a ka gen hilou hia? Hiai ziak in Tarsis lam ah ka taimang pah a: hehpihthei Pathian, lainatna a dim, heh mengmenglou, chitna hau, thil hoihlou lehngatsan sek na hi chih ka thei hi. Huaiziak in, AW TOUPA, tu’n ka hinna hon laksak di’n k’on ngen hi; kei di’n hin sang in sih a hoih zaw ngal a, a chi a. Huan, Toupa’n, na heh maawk na hih dik hia? a chi a (Jonah 4:1-4).
Jonah toh kisai ngaihtuah sau zek le:
- Ninevi mite Jonah thugen ziak a akisik uh lamdang maw? A thugenpa hilou a, a thugen in thil a hihtheihna muh theih hi. Jonah in a thugen ding a dakkal a sim kisakhawl zen a bang gen leng a hoih de aw chihte ngaihtuahna a hun zang ding in gintakhuai lou hi. Chi dik tuh himhim lehang Pathian in pou sak thei hi.
- Jonah in Ninevi mite a huatna ziak om hi. A tanchin i gen chiang in hun tamzaw ah hiai kimangngilh kha sek hi. A hih dik ahi chi ihi kei a, himahleh khenchiang in Jonah kibang thei hi. Hun paisate ah ISIS-te gamtat mulkimhuai dan WhatsApp leh social media tuamtuam a muh theih ding om sek hi. Hiai ISIS-te gamtatnate sang in Assyrian-te gamtatna uang zaw tham hi. Huaiziak in Jonah a ding Ninevi-te huat theih tham a bang hi. Himahleh Pathian in a it a, a kisik ding uh a deih hi.
Hiai dotna kidong sin le… Na huat ziak a Pathian’ thu na genpih utlouh kua a om a?
Pa aw, na thu a ginna ka neih tawm ziak uleh ka melmate uh nang it bang a ka it zohlouh ziak un hon ngaidam in.
Unaute Toupa’ ni zingpha. Tuni kikhop nuam chiat.