Saiha lupna a lum a, a tutphah sau tungte ua kizia a, belam hon lak a belamnoute leh bawng omte lak a kipan bawng tuite ne a; Kaihging a thadahna la sa a, David bang a amau a ding a la tumna bawl a; Belhbu lian a uain dawn a, sathau hoihpen a kinuhte mah; himahleh Josephte haksatna ziak in a lungkham kei uh (Amos 6:4-6).
Tuni a i tangteel ka sim in ka dip hon vut vungvung dotna babgzah hiam om hi. Ka kiim leh kiang a mi omte khalam dinmun, ahihkeileh ka omna Pathian’ saptuam mite khalam dinmun ka ngaihsak ding bang in ka ngaihsak zou na hia chih kingaihtuahna tampi hon pia hi.
Ni khat sung hun ka zatna ah ka ngaihtuahna tamzaw bang ahia? Pathian kiang a ka thum chiang in bang ka gen tam pen sek a? Midangte toh ka kihou chiang in ka poimoh ngaihpente bang ka gen tam pen sek a? Hiai dotnate tengteng ka lungsim ah hong lang in hon kingaihtuahsak dedu zozen hi.
Nang la bang na chi a? Na khalam hinkhua adia poimoh lou thilte kia in hun na zangbei kha sek hia? Kha mangthangte na vei ngei sam hia? Ahihkeileh Khrist a na unau nungtolhte na ngaihtuah ngei sam hia? Tangtawn daih ding thilte sang in tomchik daih ding thilte kia’n na hinkhua a tuammang kha hia?
Pa aw, kha mangthangte’n nang hon dah sak bang a ka dah sam theihna ding un hon panpih in. Na hon vualzawlnate ziak a ka khalam thilte uh ka nelhsiah louhna ding un hon panpih inla; na vualzawlnate midangte panpihna a zang thei sam ding in hon pi in.
Unaute zingpha. Tuni hun zatnuam chiat.