Toupa’n, huchipi’n leng tu’n na lungtang tengteng ua an ngawl in, kap in, lungkham in kei lam hawngnga le uh chin. Na puan uh hilou in na lungtang uh botkek unla TOUPA na Pathian uh lam nga un; amah hehpih theitak leh lainatna a dim, lungnel leh chitna hau, thil hoihlou a kipan kik nawn sek ahi, a chi hi (Joel 2:12,13).
Thugen tawp chiang a mi’n, “na thugen kei a din poimoh mahmah e”, “ka phattuampih mahmah”, “kibawlna di tampi ka mu” hon chih chiang un nuam mahmah hi. Ken leng hiai bang kampaute ka zang kha sek hi.
Hiai bang hun in lungsim taktak a i chih leng hi kha thei hi; ahihkeileh tupmawng hilou (unintentional) a zuau i genkhak hun leng om thei hi. Midang hilou a, ei mahmah kikhem a i om hun leng om thei lai hi. Phattuampih, kibawlna ding tampi om i chihte hoih lua ahih kawmkawm in i hinkhua a kikhekna taktak a om kei leh phatuam lou hi.
I hinkhua ah kikhekna taktak om kei mahleh i hihkhelhte kipuanna in kisik taktak dan a kingaihtuahna hon pe thei hi. Himahleh Pathian in bel a thu kia, i kam kia hilou a thilhih leh nasep a kibawlna taktak hon ngiat hi. Bawl khial ka hi i kichihna pen a sia ahi, poimoh lou ahi chi i hi kei a, himahleh hiai tuh kibawl hoihna taktak a omna dia kalbi masa lel ahi zaw hi. Pathian’ thu tungtawn a i hinkhua a thil omte diklou ahi chih i theih leh adik a kibawl tuh Pathian’ thumanna ahia, i niteng hinkhua a i tup gige ding ahi hi.
Kisikna taktak i Pathian i zot chiang in a zahngaihna, hehpihna leh vualzawlnate kitang zaw hi.
Hehpihsiam Pa aw, a thu kia hilou a nasep toh kon it taktak theihna ding un hon panpih in. Diklou ka hi chih ka kitheihnate uleng nasep a lakkhe thei din hon panpih in.
Unaute zingpha. Tuni hun zatnuam chiat.