Gamdai ah ka hon theita a, khokhalna mahmah gam ah. A loupa hing nou mitmet mun uh bang in, a maute hihdim in a om ua; hihdim in a om ua, huan a lungtang uh hihlet in a om; huaiziak in kei a hon mangngilhta uhi (Hos.13:5,6).
Gamdai a i om chiang in, panpihtu bei i kisa sek hi. I gil akial a, i dang ataak a, gam mang (lost) in paina ding theilou in i om sek hi. Lunghimoh in lauhna toh i kidim sek a, eimah mah leng kitheichian lou khop in i om sek hi.
Himahleh hiai mun tuh ei a ding mun hoih ahi.
Khuaizu leh bawngnawi luanna gam i tun chiang in bel i tha a hat hi. I vah a, i lung a kim a, eimah leh eimah ah kimuanna i nei thei hi. I hangsan a, thu i nei mahmah hi.
Ahihziak in ei a ding a mun lauhuai ana hi.
Gamdai a i om hun in Pathian i ngai mahmah hi. Huaiziak in Sawltak Paul in hiai ana gen hi : “Huaiziak in, Khrist ziak a hatlouhna ah, liamna ah, taksapna ah, sawina ah, lungngaihna ah ka kipak zel ahi; ka hatlouh peuhpeuh in ahi ka hat zawk” (2 Kor.12:10).
Himahleh khuaizu leh bawngnawi luanna gam ah bel hiai bang lungdonna i nei kei hi. Huaiziak in Jakob in mihau hihneu a om ziak a kipak ding in ana gen hi, aziak bel “loupa pak banga a man ding ziak in” ana chi hi (Jak.1:10).
Na hinkhua haksat luatna omlou a nuamtak a khosa in na kithei hia? Pathian kiang ah kipahthu gen in. I khosakna a nop a, i lungkim chiang in i khalam hinkhua a ding in “danger point” (lauhuai) ahi gige chih mangngilh ken.
Pa aw, ka hinkhua ua thilhoih non piakte ziak in kipahthu kon gen uhi. Gamdai non totsak khakte ziak in leng phunlou in kipahthu kon gen zaw uhi. Ka haksatnate un nang kon poimohna uh hon langsak zelzel hi.
Unaute zingpha. Tuni hun zatnuam chiat.