Huan Toupa’n ka kiang ah, hitamahleh kuan inla, a lawm in a deih tuntun numei, angkawmnu it in, pathian dangte lam nga in, grep gam beute it mahle uh, Toupa’n Israel suante a it bang tak in. Huchi’n kei di’n amah dangka pek sawm-le-nga leh, Barlibuh homer khat leh, barli-buh homer kimkhat in ka leita hi (Hos.3:1-2).
Seppih lawmhoih, preacher khat in numei kizuak khat zi a nei dek chih thu ka za uhi.
“Huai nu hial zaw kitenpih tel ken, nang adia hoihlou di ahi, Pathian’ nasem khat hi chin a, maban ah na lungsim hon nasak lel di ahi; amah sang a hoih zaw mu ngal di na hi“, ka chi souhsouh uhi.
Himahleh a kitenpih teitei a, ka gen bang mah un pasal dang hon ngaihsan petmah hi. A pasal lungngai a si dek zen in a nusia hi. A zi ngai in lungkham leh thawmhau tak in hinkhua hon zang a, vuallel leh tangkhat a kisa mahmah hi.
Aguk tak in bel a zi’n a paisan ka kipak chiat sim uhi. Hehnep theih tawp a hehnem in, nang adia thil hoihzaw hi ding ahi ka chi chiat uhi.
“Na hinkhua kekgawpsa teng zomkhawm inla, maban kalsuan dan kisin in. Nang adia ginom numei hoih, itna diktak toh hon it maban a mu kha ding na hi…huchibang numei hoih phu (deserve) na hi” ka chi uhi.
Huchiin itna hon mu nawn a, himahleh numei dang hilou in amah paisansa, huai kizuak numei, a lungtang keksaktu mah ana hi zel hi.
Kou a lawm ten ka gingta thei mahmah kei uhi. “Bang chi tel na hia? Bang ngaihtuah himhim na hi de aw? A hai dek na maw? Nang adia ginom thei din na gingta himhim ahia? Na itna hiai numei nun phulou (don’t deserve) lua ahi” ka kichih huan suusuau uhi.
Himahleh ka lawmpa uh Hosea in kou lam nga in hon en a, “Ka thilhih na thei uhia? Hiai numei, na muhsit uleh na muhniam mahmah nu un, nou tengteng om dan hon lak (represent) ahi! Aziak-asan omlou a amah ka it tawntung na in Pathian’ itna hon lak ahi. Pathian in bang chituk a hon it ahia chih hon lak ka hi!” hon chita mai hi.
I vek un, numei kizuak Hosea’ zi, Gomer bang in i pasal, i Toupa Jesu i na zuausan kha chiat uhi. Hiai theisiam hi maizen le hang Toupa’ ni teng in i pasal’ dohkan mai ah mit tui luang zoihzoih kawm in, it taaklouh hon it teiteina ziak in kipahthu i gengen thei ding hi.
Aw itna lamdang! A min ngaih e!
Pa aw, it taakloute himahle ung non it teitei ziak in kipahthu kon gen uhi. Nang adia ginom zaw sem thei din hon panpih in.
Unaute zingpha. Tuni hun zatnuam chiat.