Himahleh van TOUPA dem in na kihih sang a; huan amau na ma ah a inn a tui-umbelsuante a hon la ua; huan nang leh na toupate, na zite leh na meite’n, huaite in uain na dawn uh; dangka, leh dangka-eng, dal, sik, sing leh suang pathiante, mu theilou, za theilou, thei theiloute na phat a; huan Pathian a khut a na hatna a omna, na lampite tengteng amah ahi, na thupi bawlta kei hi (Dan.5:23).
Tuni i tangteel a “Pathian a khut a na hatna a omna” chia kilet English ah “Pathian a khut a na nakna tawipa/omna (the God who holds your breath in His hand – NKJV) ch’n kigelh hi. Hiai in minute khat, second khat sung lel a i naknate leng ei khut a omlou, Pathian in a khut a atawi liauliau ahihdan hon musak hi.
I tangteel tuh Daniel in Babylon kumpi Belshazzar kiang a athugen ahia, kumpipa’n a nakna (hinna) tawipa Pathian nelhsiah in ama a ding a bangmah hih theilou pathian lemte phat in a tawisang hi.
Mihingte nakte Pathian khut ah om hi.
Hiai thu thuuktak in ngaihtuah sin mah dih. Nakna buai hetlou a zingkal na thoh theih ziak Pathian in nakna hon piak ziak lel ahi. Mahni a huih kidiik zoulou, sum tampi seng a oxygen kibulh mi om hi. Pathian in mihing a hon bawl kia hilou in tutan i hin theihna hun teng a i nakna hon piak ziak ahi hi.
Na huih dikte ziak a Pathian kiang a kipahthu na gen nanung pen bang chik hi in na thei a? Kipahthu na gen ngei hia?
Daniel in kumpi Belshazzar kiang tuni a i tangteel a gen ni nitaklam mah in a nakna a bei hi. A hinkhua Pathian khut a om ahia, huai nitak mahmah in a sukbei sakta hi.
I hinkhua Pathian in a hon bat ahi het kei hi. Hinapi in Belshazzar bang in i naknate a min gensiatna ding in i zang kha sek hi.
Na hu la in nak inla na huih diklutte kha khe nawn inla (deep breath), huchibang a na hihtheih ziak in kingainiamtak in Pathian kiang ah kipahthu gen in.
Pa aw, hon bawltu leh ka hinna uh kemtu nang na hia, kipahthu kon gen uhi. Ka naknate uh na min pahtawina a ka zat theihna ding un hon panpih in.
Unaute zingpha. Tuni hun zatnuam chiat.