Baang a agelh mah bang un sungpi kongkhakte ah cherub leh tum sing lim a gelh chiat lai ua; sum tawng pua ah sing pek sah mahmah a phalh uh. Huan sumtawng bang langtuakte leh singpek phalhte ah tawlet hon theihlouh leh tum sing lim a om lai a; a innpi pang dantan leh singpek phalh leng huchibang mah ahi (Ezek.41:25,26).
Ezekiel bung masa lam ah a mite’n milim a biak ziak ua Pathian a biakbuk a teeng nawnlou leh agam uh nuseta ahihdan i simta hi. Bung 40-48 kikal ah biakbuk tunding nawnna leh agam uh luah thaknawnna (reinhabited) a om nawn dan mengmuhna (vision) i mu hi.
Tuni a i tangteel tuh Ezekiel in biakbuk a Mun Siangthoupen a mengmuhna thu ahia, biakbuk leh Eden Huan in kibatna a neihna uh a om hi.
Mun Siangthou leh Mun Siangthoupen kikal puanzak ah cherubte lim gelh in om a, Mun Siangthoupen a kikoih Pathian’ omna zahngaihna tutphah liahkhuh (overshadowed) in cherubte a om uhi (Ex.25:17-25; Heb9:5).
Eden Huan a hinna sing lampi veng ding a Pathian in cherubte a koih mah bang in (Gen.3:24), puanzak leh zahngaihna tutphah tung a cherubim lim omte’n Pathian’ sianthouna veng uh ahihdan hon langsak hi. Pathian omna ah mikhialte kilut theilou hi.
Tuni a i tangteel in Ezekiel laibu ah poimohna biik nei a bang hi. Bung masa lam ah milim biakna ziak a Pathian’ ompihna in biakbuk nuseta ahihdan i mu a, himahleh a tawpna lam ah Pathian tuh a biakbuk thak a teng thak nawn ding ahihdan i mu thei hi (43:5ff).
Thukhun Thak ah eite’n Pathian’ omna puanzak nung lam Mun Siangthoupen ah Jesu’ sisan ziak in lutngamna i nei theita hi (Heb.9:19-20). Puanzak tuh lakkhiak in a omta a, cherubte’n a ven a ngai nawnta kei hi.
Pa aw, na omna puanzak nunglam a lut theihna hamphatna non piakte ziak in kipahthu kon gen uhi.
Unaute zingpha. Tuni hun zatnuam chiat.