Huan namte lak a sal a ka tansak nawn a, a gam ngei ua ka pikhawm nawn dan ah kei TOUPA a Pathian uh ka hi chih a thei ding uh; huai ah a lak ua khat lel leng ka nuse kei ding; *Amau a kipan ka mel ka sel nawnta kei ding:* Israel innkote tung ah ka kha ka sungta ngal a, chih TOUPA PATHIAN thu pawt ahi, chi’n (Ezek.39:28,29).
Nidang in mun tuamtuam a omte toh i kihou ut chiang in laithon kikhak in i kithuzak a, huai zoh in telephone tungtawn in i “aw” (voice) mahmah kizatuah in i kihouthei hi. Tuni chiang in i “aw” vuak hilou in mel mahmah kimutuah thei “video call” chih bang om theita hi.
Mel kimutuah a kihoutuah in poimohna biik nei a, i ngaihtuahna leng hon kinaisak biik a bang hi. I mizia leh i hihna ban ah i nungchang ding bang tan hiam kimuhtuah theih in om hi. I mel tuh hon zomtuahtu leh i kipomtuah theihna hon musaktu ahi hi.
Himahleh a lehzawng (reverse) leng a dik theihna om veve hi. David in Pathian kiang ah, “a khelhna akipan a mai sel ding in” a thum a (Sam 51:9), Pathian vaihawmna leh deihlouhna (rejection) a phawk (feel) hi. Pathian’ mit tuh thil gilou en ding a siangthou lua ahihdan a thei hi (Hak.1:13).
I khelhnate ziak in Pathian mel tuh ei akipan sel in om mahleh Jesu Khrist’ sisan tungtawn in a mel siangthou tak mai ah siansak in i om thei a, kipahhuai mahmah hi (1 Kor.6:11). Huaiziak in Pathian mel ei akipan sel mang ding lau nawnlou in pianthakna a sawp in leh Khasiangthou a thaksakna i neita hi (Tita 3:5).
Pa aw, ka khelhnate uh na hon sawpsiangsak ziak in na mel kou a kipan selmang ding laulou in ka om theita uhi. Na min tuh zahtak leh tawisan a a om theihna ding in hon panpih in.
Unaute Toupa’ ni zingpha. Tuni kikhop nuam chiat.