TOUPA thu ka kiang ah hongtung a, ka kiang ah, Nang, mihing tapa, Tyre kho sun a la phuak inla, Tyre khua kiang ah- Aw nang tuipi gei a teng sek, tuipi gei gam tampite kiang a sumsin, TOUPA PATHIAN in hichi’n a hon chi ahi: Aw nang Tyre, ka kilawm buching na chi maw: Na gam in tuipi lai a sun hi, nang hon bawlte’n a hon kilawm tungtuan sak mah ve ua (Ezek.27:1-4).
Tuipi a kisumdawntuahna ziak in Tyre tuh a kiim a gam omte’n a eng mahmah uhi. Ezekiel in mun tamtak ah Tyre toh tuipigei a sumsinna (coastlands trading) a gen kha hi. Tyre a kibawl khaulou san (purple dye) leh Lebanon gamlak a sidar singte bang a man tam mahmah uhi. Hiaite ziak mah in Tyre tuikulh khopi (island city) tuh a hausa mahmah hi.
Lohchinna leh hausakna i chihte thil diklou ahi diam? I kuhkalna, i lohchinna leh i sepgah zarzou khelhna ahi diam? Ahi het kei hi. Himahleh hiaite tengteng in mihing ah kisaktheihna om sak baih mahmah a, huai ah i pilvan angai hi.
Vualzawlna i tante’n i hinkhua hon thunun zawlou a, huai vualzawlnate hon petu Pathian in hon thunun zawk theih nang in panlak gige poimoh hi. Amah lou a bangmah i hihlouh dan mangngilh ngeilouh kisam hi.
Pa aw, ka hihna sang mah ua kana kingaih thupi khaksek ziak un hon ngaidam in. Ka hai kisaktheihnate uh hon niamsak inla, na vualzawlna ka tante uh ziak a na kiang a kipahthu gen thei zaw din hon panpih in.
Unaute zingpha. Tuni hun zatnuam chiat.