Juda kumpipa Josia tapa Jehoiakim lal pat tu’ng in hiai thu TOUPA kiang akipan a hongtung a, Toupa’n hichi’n a chi: TOUPA inn huang sung ah ding inla, Juda khopi tengteng Pathian be ding a TOUPA inn a hong paite kiang ah a kiang ua gen dinga thu ka hon piak tengteng khat lel leng im lou in gen vek in (Jer.26:1,2).
Tuni i tangteel akipan thil nih chiamteh lehang ichi hi.
- Pathian mite’n thutak kihilhna hun kipoimoh gige hi. Bang ziak a saptuam kikhop hun a thugenna hun om sek ahia? Bible class khawng nei sek hang a, bang ziak a huai sen mailou? Pathian taten Pathian’ thutak kihilhna hun leh kihasotna hun kipoimoh gige hi. Polam mite kiang a Tanchinhoih i gen a, khamangthangte i mat kia hunlou in, baptisma tanzoh chia om didan, ginom didan, Pathian’ thutak zang a khalam piching ding a kihasotna leng a poimoh hi.
- Biakna i telte hoih mahmah a, himahleh huai kia i khalam a ding in huntawk lou hi. Toupa’ ni kikhawm a, nidangte a ut dandan a khosak Pathian a din pomtak tuanlou hi.
Zawlnei Jeremiah hun in Pathian’ mite’n a thupiakte nelhsiah a angaihsak louh ziak un gawtna maituah ding in om uhi. Huchimah bang in ei tung ah leng tung thei gige hi (Lk.13:1-5).
Pa aw, na thutak gentu thu nasemte thutak hangsan tak a khovel mite leh na tate kiang a gen ngam ding in hangsanna hon pia in.
Unaute zingpha. Tuni hun zatnuam chiat.