Aw TOUPA, na kiang a ka phun in leng, nang zaw na dik nilouhlouh a; himahleh ka vuina thu pen ka gen himhim sin. Bangchi’n ahia mi thulimloute lam a lamzan sek nak? Bangchi’n ahia khemhat peuhmah nuamsa a a om nak uh? (Jer.12:1).
Bang ziak a mi hoihte genthei a, mikhial ten nuamsa?
Hun paisa ah Pathian mi ginom taktakte’n leng theisiam lou in hiai dotna ana dong sek uhi. Zawlnei Jeremiah kia hilou in zawlnei Habbakuk in leng ana theisiam kei a (Hak.1:2-4,13), Job in leng dotna ana bawl a (Job 21:7), Sam laibu bung nih hilhial ah hiai toh kisai ana kigen hi (37, 73). Himahleh Pathian in hiai ziak ahi chia kichiantak a adawnna Laisiangthou a i muh louh ziak mah in tuni’n leng khristian tamtakte’n hiai dotna kinei kha sek hi.
Ei khristiante sang mah in Thukhun Lui hun a Pathian’ mite a ding in theihsiam huai lou zaw ding a bang hi. Pathian in taksa thil mahmah ah leng muh theih in panpihna ana pia a, huaiziak mah in khalam thil leh vangam lam sang mah in taksa lam mah etkhak baihsam ding hi. Himahleh Thukhun Thak ah bel Pathian in hon thuchiam khovel thilte hilou in, i sihnung vai, vangam leh khalam thilte ahihdan chiantak in kimutheita hi.
Hiai dotna toh kisai Pathian dawnna khenkhat leh Laisiangthou akipan i muh theih khenkhat zingchiang in i et beh ding.
Khovel a khosa lai i hihman un khenkhat bel i tuhgah mah aat a genthei in i om sek ua, himahleh khenkhat bel tuhgah leng hilou, mi hoih leh Pathian adia ginom mahmah hinapi a genthei leh haksatna tuak a om uhi. Koi pen i hi zaw a? Aziak-asan thei kei mah le hang i haksatna, lungkhamna leh gentheihnate’n Pathian toh hon kinaihsak zaw hia, ahihkeileh hon kigamlasak zaw? Sawltak Paul in bel hiai ana chi hi:
Khrist itna a kipan kua’n ahia hon khen ding? Gimthuakna in hia, lungngaihna in hia, sawina in hia, tam in hia, vuaktanna in hia, lauhhuaina in hia, temsau in hia hon khen ding?…Khenlou hial ding, huaite tengteng ah, hon itna ziak in, vualtungtuangte sa’ng a tungtuang zaw i hi hi. Sihna hiam, hinna hiam, angelte’n hiam, lalnate hiam, thil om lelte hiam, thil hong om dingte hiam, thilhihtheihna hiam, sanna hiam, thukna hiam, thilsiam dangte himhim hiam in leng, i Toupa Khrist Jesu a om Pathian itna a kipan, hon khen thei kei ding chih diktak in ka thei hi (Rom.8:35-39).
Unaute zingpha. Tuni hun zatnuam chiat.