Toupa’n hichi’n a chi: Mi pil in a pilna suang kei hen la, mi hat in a hatna suang sam kei hen la, mi hau in a sum leh pai suang sam kei heh. A suang peuhmah in hiai suang uh heh, kei TOUPA, chitnate, vaihawmdiknate, diktatnate lei a zang sekpa ka hi chih a hon theih a, a theihsiamna tak; hiai thilte lah ka kipahlam ahi ngal a, chih TOUPA thu pawt ah (Jer.9:23,24).
Tuni i tangteel akipan Pathian’ mi ten i suan ding, Pathian’ kipahna i mu thei hi. Huai tuh mihing pilna hiam, mihing hatna hiam leh sum-le-pai hiam hilou in, Pathian theihna (Knowing God) ahi zaw hi.
Mihing ten i pilna, hatna leh neih-leh-lamte suang a kisaktheihpih a baihsam mahmah hi. Himahleh Pathian in bel huaite sang mah a Amah Pathian ahihdan theih a, huai kisuanpih tuh a kipak zaw hi. Pilna, hatna leh sum-leh-paite a poimoh kei chi ahi kei a, himahleh huaite teng a hon petheitu Pathian i theih kei leh bangmah hilou hi (cf.Deut.8:10-20).
Sawltak Paul in, “Pil kisa khem in mihai a hong suak ua, sitheilou Pathian thupina sethei mihingte leh vasate, gamsate leh bokvak ganhingte lim in a suaksak uhi” (Rom.1:22,23) ana chi hi. Pathian theihna ding Pathian’ thu a zonglou in, amau ngaihtuahna leh pilna zang in Pathian a zong ua, a bawlsate peuh a Pathian hisak in abia uhi. Hun tamtak ah khristiante leng hiai pathian lemte mah Pathian tak sang a pibawl zaw in, i be kha sek uhi.
Pathian i thei taktak na hia? Pathian i theihna ding in A thu (Laisiangthou) ah i zong na hia? Khristian kichi tamtak ten Pathian theichianlou pi in khalam a khami dan in om sek mah le uh; Pathian theiloupi in khamitna dik kichi om theilou hi.
Unaute zingpha. Tuni hun zatnuam chiat.