A ngaihkhiak theihna ding un kua ka houpih in, kua ka theisak dia? Ngai in, bil lam zeksumlouh ahi ua, a ngaikhe thei kei uh; ngai in, TOUPA thu amau a ding in thil simmohhuai ahi a, kipahna mahmah a nei nawn kei uh (Jer.6:10).
Taksa a nangonna (deafness) sang in khalam nangonna poi in khawkzaw tham hi. Taksa a nangonna pen leitung i hinsung lel toh kisai kha a, khalam nangonna pen bel i tangtawn dinmun ding toh kisai kha hi.
Khalam a nangong ihih leh hihlouh bang chi’n i kithei dia? Tuni a i tangteel akipan akitheih theihna (symptom) bang zah hiam muh theih in om hi. Jeremiah in, “Pathian thu ah kipahna himhim a neih louh ziak un a ngaikhe thei kei uh” achi hi. Mi khenkhat in Pathian’ thu dangka-eng (gold) sang a leng deihthoh zaw a om lai ua (1 Pet.2:2-3; Sam 19:10), en kipahpih lou a Pathian’ thu sang a mahni deihdan leh utdan telzaw ihihleh khalam nangong ihi hi.
Khalam nangonna tuh amah a hong om mawk hilou in, ei deihtelna (choices) ziak a hong om ahi zaw hi. I bil zeksum i kisin a, i lungtang Pathian kipaksak dia deihtelna i bawl angai hi. Pathian’ deihdan pen i hinkhua pitu dia i teel chiang in i bilte a thu ngaikhe ding in a kihong ding a, huchiin a thu ngaihkhiak utna i nei ding hi.
Pa aw, na thu za ding a ka bil uh ka hon theihna ding un hon panpih inla, ka mit uh vaksak a, ka lungtangte uh nang kon piak theihna ding un hon panpih in.
Unaute zingpha. Tuni hun zatnuam chiat.