Toupa aw, hon hehpih in; ka hon ngak nilouh uhi; zingsang teng in ka ban uh hong hi inla, buai hun chiang in leng hon hondampa hong hi in (Is.33:2).
Khelhna tung a i vualzoh theihna ding thuguk bang ahi dia?
Tupguhna (willpower) in bang tan hiam hon panpih mahleh khelhna tung a vualzohna taktak ding in hi theilou hi. I doute sa leh sisan nei hilou in kha gilou hon omte ahi zaw hi (Eph.6:12). Hiai kidouna ah i melma dawimangpa tuh ei sang in lianzaw, hatzaw, pilzaw leh zeisaw hi. Huaiziak in ei tupguhna kia toh i dou leh i douna ah i vuallel gige ding hi.
I vualzohna ding tuh ei thahatna hilou in, Pathian hatna ahi zaw hi. Amah tuh Israelte’ Mi Siangthoupa ahia, Siangthou, Siangthou, Siangthou Pathian ahi hi. Amah hatna toh i vuallel thei kei a, a hon panpihna toh vualzou ding i hihdan leng hon chiam hi.
Pathian tellou in khalam kidouna ah, khelhna tung ah i vualzou kei ding chih i theihsa ahi. Himahleh Ama’ galvan tellou in ei hatna kia toh kidouna phual ah kikuan kha sek hi. Thuumna leh Pathian thu, Pathian’ galvan kim la in, kithuam in dou lehang i zou ngeingei ding hi. Huaiziak in hainuam dah inla, Toupa’ galvan toh kidou ding in kisa gige in.
TOUPA ka vakna leh hon hondampa ahi; kua ka lau dia? TOUPA ka hinna innsang ahi: kua ka kihta dia? (Sam 27:1).
Unaute zingpha. Tuni hun zatnuam chiat.