Mi thulimlou zaw deihsak in om mahleh, diktatna a sin tuan sam kei ding: dikna gam ah diklou tak in ahih ding a, TOUPA thupina a mu tuan kei ding (Is.26:10).
Pathian om ahi chih ginglel ten Pathian om ahihdan theihtheihna (evidence) tampi a nelhsiah uhi. Pathian in a thupina van leh huihkhua ban ah a thilsiamte ah langsak hi (Sam 19:1; Rom.1:20). I nek ding leh i kipah theihna ding in khovel tuh vuahtui leh nek ding tuamtuamte in a vualzawl hi (Nas.14:17). Khovel ah Pathian bawlsa leh vualzawlna tuamtuamte ziak a khosa hinapi a, bang ziak a mite’n Pathian ginglel sek ahi di ua?
Hun tamtak ah a hinkhua ua Pathian a deih louh ziak uh hi ut mahmah hi. Amau utdan leh hoihsak bang a om ut in, huai dan lou a thuhilhnate a ngai ut kei uhi.
Pathian a om leh omlouh toh kisai a buaina ana nei kha i om leh ka thugelh i lakkhelh louh deih huai kasa hi. Dotna poimoh leh dottuak mah dotna omte dawnna i pe kei ding chi ka hi kei a, dottuakte donglou in i mawk gintak ding chi le ka hi kei hi.
Himahleh chet theihna tuamtuam omte na bukkak vek nung a Pathian ginglel lai na hihleh na lungtang lampang ah na hih ding om lai ahi kha ding hi. Pathian gintakna kichi dotna om theite dawnna piak theih ziak kia toh kisai hilou ahi i chihna ahi. Ginna ichih i lungtang (heart) toh kisai kha hi. Evidence tuamtuam video 100 val en in, laibu 1000 val sim mah lehang, ginomna toh Pathian zong ihih keileh kimu lou ding hi. Na gintak louhna ding na zon a, huai ten na sia leh pha theihna hon nemsak (soothe your conscience) aleh Pathian toh kisai thutakte hon pumpelh sak deuhdeuh ding hi.
Pa aw, nang hon ginglel ka om khak ua leh ka lungtang uh hon nemsak inla; om taktak na hihdan na thilsiamte tungtawn a non lahte hoihtak a muthei ding in ka mit uh hon vaksak in.
Unaute sunpha. Tuni hun zatnuam chiat.