Huai ni chiang in hichi bang in na chi ding a. TOUPA aw, kipahthu k’on hilh hi; ka tung ah na hehta mah le chin, na hehna lah a daita, nang hon khamuanta nei ve (Is.12:1).
Isai bung masa 52 tan ah thu kikangtuah nih a om tou den hi.
Pathian tuh siangthou leh diktat ahihna gen tuantuan in om a, Israelte’ Mi Siangthou (the Holy One of Israel) chih bang a kizang mun mahmah hi (1:4; 5:19; 12:6; 30:11-12, 15; 48:17; 60:14). Bung 6 ah Isai in sapna a muh lai in, a mengmuhna ah “Siangthou, Siangthou, Siangthou” Pathian chih in mu a, amah mikhial ahihdan a kimu hi.
Bung 39 tan ah Pathian in Israelte a vauhilhna, a tung ua aheh mahmah ziak a thukhen khum ding ahihdan muh mun in a om hi (5:25; 9:12, 17, 21; 10:4, 5; etc.).
Ahihhang in bung 52 tan ah Pathian zahngaihna leh ngaihdamna thuchiam muh theih in om hi. Pathian in a khelhnate uh lakkhiaksak a, vuk bang a ngousak ding ahihdan leng i mu hi (1:18). Bung 43 tan in Pathian in a mite a itna thu chiansak thakthak a, a khelhnate uh nulmang sak a, theihgige lou ding ahihna ah laulou ding in khamuan hi. Bung 40-48 kikal sung lel ah Isai in Pathian tuh Israelte’ Tanpa (Redeemer) chiin 8 vei val agen hi (41:14; 43:14; 44:6, 24; 47:4; 48:17; 49:7, 26).
Ahihleh Israelte’ Mi Siangthou, Israelte gawt ding chipa bang chi dan a Tanpa hithei zel ahi ding? Khenchiang a heh mahmah a gawt ding chi, khenchiang a ngaidam ding chih zel; bang chidan a thil hi thei ahi dia?
Hiai thu kikangtuahte gel bung 53 i tunma tan genfel in omlou hi. Hiai bung ah khelhna toh kisai ahehna ziak a Pathian in a thilhih muhtheih in om hi. A hehna a mite tung ah bungkhe lou in, a Tapa a thuaksak hi.
“Ama’n i natnate pua in, i dahnate leng a po ngei a: himahleh en bel dahna khu, Pathian vuak, hihgentheih in i bawl ngal ua. Ahihhang in i tatleknate ziak in amah liam in a om a, i thulimlouhnate ziak in vuak sidup in a om a: i lungmuanna ding in sawina a tung ah a kia a; a vuakna golhte a hihdam in i omta hi” (53:4,5).
Pa aw, kiniamkhiak tak in ka khelhnate uleh ka zumhuainate uh kipuang in na laltutphah mai ah ka hong pai uhi. Muk ninte ka hi uh. Nang bel na Siangthou, Siangthou, Siangthou hi. Ka dittatna pen uleng na mai ah puanse nim bang lel ahi. Ka phulou uh himahleh ka khelhnate uh hon ngaidam in. Na Tapa in kross tung a kou adia a thilhih ziak in hon ngaidam zaw in!
Unaute zingpha. Tuni hunzat nuam chiat.