Ei ding in naupang a hong piang a, tapa piak in in omta; vaihawmna a liangzang ah a tuang ding a; a min Lamdang, Lemthei, Pathian Hat, Khantawn Pa, Lemna Lal lah a chi sin ngal ua (Is.9:6).
Laisiangthou ah Jesu genna ding a kizang thumal tampi muh theih om hi – Grep gui (Vine), Belampu Hoih, Lampi, Thutak, Hinna, leh adangdang. Hiai gendan tuamtuam ten Jesu hihna chi tuamtuam leh ei a ding a anasepte hon lak hi. Tuni a i tangteel a min kipia Lamdang leh Lemthei chih thumalte en leng ichi hi.
“Lamdang” kichi thumal Hebrew thumal hong kipatna tak ah i etleh i zat naran sang in a thutuun a thukzaw hi. Thil khat theihsiam vuallouh (incomprehensible) genna lam a kawk hi. A thuhilhnate akipan leng lamdang ahihna muh theih hi (cf.Matt.5-7). A thuhilhnate mihing ngeina dan ngaihtuahna toh kilehbulh a bang hi. “Gentheite a hampha uh, lungkhamte a hampha uh, mi’n hon sawi chiang un kipak un” chih leh thuhilhna tuamtuam a piakte mihing lam etna ah lamdang chihlouh theihlouh hi.
Eipau a “Lemthei” chi a kilet, English ah Counselor a kichi hi. Buaina neite thuhilh a chialpi bawltu, thuhilhna petu, mipil, Solomon bang a kumpi pil chihna ahi. Jesu tuh Kumpi pil, Solomon sang a leng pilzaw ahi hi (Lk.11:31). Aman counselor dangte sang in leng hon theichian zaw a, i ngaihtuahna leng ei leh ei i kitheih sang in leng hon theichian zaw hi. I kipah, i lungkham leh i ngaihtuahna thukpen leng a thei hi. Amah tuh i Counselor ding in a chin petmah a, bang chi bang buaina leng a hihveng thei hi.
Unaute zingpha. Tuni hun zatnuam chiat.