Huchi’n na khut uh na zak chiang un leng ka mit k’on humsan dia: ahi, tam veipi na thum chiang un leng ka ngaikhe kei ding: na khutte ulah sisan in a dim ngal a (Is.1:15).
Zawlneite laibu i sim leh mohna neiloute (innocent) nuaisiah tak a nengniam a, muhsit ahihchiang ua Pathian in a ngaihkhawk dan muh theih hi. Tuni a i tangteel ban tang nih i sim zom leh pa neiloute leh meitheite gum ding in Pathian in a mite a hilh hi (1:17).
I niteng hinkhua ah leng panpihtu ding neilou mite nuaisiah tak a bawl a om i muh chiang in i pona hi. Hiai tuh thildik leh Pathian mite om ding dan mah leng ahi.
Huchih kawmkawm in naungek piang nailou, hinkho nei, nute gilsung a omte dinmun i ngaihtuah kha ngei hiam? Amau mohna om hetlou a thah a aom chiang un Pathian in amaute a et bang in i en thei diam?
Ahihkeileh ana upata, i nu leh pa, ipi leh pute, amau leh amau kikem thei nawnloute hinkhua ding i ngaihtuah ngei hia? Amaute ning in kem peihlou in i om kha diam? Huai bang lungsim nei kawmkawm a Pathian i biakna Pathian a dia pomtak din i gingta hia?
Ahihkeileh pianken a vual phaloute bang na chi bawl a? Muhsit, nuaisiah leh simmoh a awlsam mahmah hi. Hiai bang gamtatna toh Pathian laltutphah mai ah siangthou tak in i ding ngam na diam?
Pa aw, amau leh amau kikem theiloute, mohna neilou dikloutak a bawl a omte hehpih a khotuah thei ding in hon panpih in.
Unaute zingpha. Tuni hun zatnuam chiat.