Zuktal leh gam a zukpite’n k’on ngen hi, aw Jerusalem tanute, ka it hihbuai kei unla, phawng kei un, a lungkim matan (Solomon Late 3:5).
Solomon Late i sim leh nupa kal ki-itna muh ding hunkhop om a, huchimah bang in kitenna polam a taksa nopsakna zatkhelh ding vauhilhna leng muh theih hi.
Tuni a i tangteel ah Shulam numei in Jerusalem tanute a thuhilhna muh theih hi. Zi leh pasal a kinei nailou, nungak-tangvalte’n kitenna sung kia adia Pathian in a koihna itna zangkhial lou ding a vauhilhna leng ahi hi. English ah i et leh “not stir up or awaken love until it pleases” (ESV) chi a, itna pen a hunlou a phon louh ding ahihdan i mu thei hi. Ahun dik, amun dik, Pathian in a koihna mun ah amah leh amah in hong om tou mai ding hi.
Tuni a i tangteel toh thu kibang mun bangzah hiam ah i mu thei hi (2:7; 3:5; 8:4). Nungak-tangvalte’n itna i delh kei ding chihna ahi kei a, himahleh huai i delhna ah Pathian koihna munlou a thagum a omsak sawmlou ding in pilvang ni.
Unaute Toupa’ ni zingpha. Tuni kikhop nuam chiat.