Huan van nuai a hih a omte tengteng tungtang pilna a zong ding leh zong khe ding a ka lungtang suah ka hi: huai a kisuk ding a mite tapate kiang a Pathian in a piak nakpitak a gimna ahi (Ekl.1:13).
English Bible ah, “…It is an unhappy business that God has given to the children of man to be busy with” (ESV) kichi hi. Khovel a i khosak lai a mihingte nakpitak a i gimna (unhappy business) tuh Pathian in a hon piak ahi chih i mu hi. Pathian in “thil teng ahun a kilawm in a bawl hi” (3:11). Hiai in sihna, kahna, huatna leh kidouna chihte leng a huam tel vek hi (3:1-9).
Kidouna, huatna (hatred), kahna leh sihnate a hoihna uh bang a om a?
Omlou hial, ei adia a hoihlam a khanlohna a hon tut theih kei uleh. A hoihlam a kikhekna a om tut leh bel hoih in phatuam mahmah a, hiai mah tuh Pathian deih leh tup ahi hi. Mihing ten haksatna tuamtuam i tuahte, i khitui luangte’n i lungtang khauhtak leng hon nemsak thei uhi. Hiai haksatnate’n a hoihzaw leh a kipahhuai zaw lunggulhna leh zonna hon tung sak thei uhi.
Setan in piltak in khovel nopnate lunggulh a, huaite delh ding in i ngaihtuahna hon thunun kha sek hi. Himahleh Pathian in bel i thuakgimnate tungtawn in hiai khovel ah kipahna bukim omlou ahi chih hon theisak thak zelzel zaw hi.
Lunggimna leh haksatna tuamtuam tan lel tuak dia Pathian in hon bawl i hi kei ua, huaite khen lam ah kipahna bukim tang ding a hon siamte i hi zaw uhi. Huaiziak in haksatna leh lungkhamna khel ah kipahna bukim, i Pathian aang a om, mu in, huai mah lamen in pang teitei zel ni.
Unaute zingpha. Tuni hun zatnuam chiat.