Ka tapa, Toupa sawina musit ke’n la; a salhna leng chimtak sam ke’n: Toupa’n lah a itte a sal ngal a; pa’n a kipahna tapa a salh bang in (Pau.3:11,12).
Ngaihtuah zual in tate bang duat in, a ut dandan un om sak in, nna bang semsak lou in, thuhilh lou in, tai ngei het kei lehang kipak mahmah ding ua, nu leh pa bang hon it mahmah le uh a kilawm hi. Himahleh mi siamzawte gendan in huchibang a kikem leh khangkhia naupangte’n a nu leh pate uh musit zaw in, amau mahmah leng a tawp chiang un a ning kitel uh, achi uhi.
Naupangte’n duatluat poimoh (ut) khollou zaw uhi. Amaute thunun a, a gamgi di uh khunsak in bitna (security) lungsim pezaw, achi uhi. Huai bang a kep leh khangliante’n nu-leh-pate’n it uh ahihdan mu zaw in zahtak leng zahtak (respect) thei zaw uhi.
Huchibang in Pathian in leng a hon it ziak in i gamgi ding hon khunsak in, huai pel a i paikhak chiang in i pai teitei louhna ding in hon thunun hun a om sek hi.
Pa aw, ka gamgi ding uh non khunsak a, non thunun zelzel ziak in ka kipak uhi. Na hon it ziak in ka kipak uhi. Nang non itna bangbang ka tate uh laksawn thei ding in hon panpih in.
Unaute zingpha. Tuni hun zatnuam chiat.