Toupa phat un! Van a kipante Toupa phat unla: tunglam ahte khawng amah phat un. A angelte’n tengteng aw, amah phat unla; a sepaihte tengteng aw amah phat un! Ni leh khate aw, amah phat unla; aksi vakte tengteng aw, amah phat un!Vante vante aw, amah phat unla, van tung a tui omte aw, amah phat un! Huaite’n Toupa min phat uh hen: ama’n thu a pia a, siam in a na omta ngal ua (Sam 148:1-5).
Sam laibu beikuan a hong hih toh kiton in Pathian phat ding ahihdan a kihahgen deuhdeuh hi. A tawpna lam bung 7 teng (Sam 144-150) ah Pathian phat ding a hasotna kimuvek hi.
Tuni a i tangteelna la/bung in khovel leh a sung a thil om teng in Pathian phat ding in hon chial hi. Angelte ban ah khovel a thilsiam lianpente akipan a neupente tan, a gamla pen akipan a naipen tan in amaute siamtu Pathian phat ding in a phuut hi.
Leitung a i dam lai siah Pathian phat a, thupina leh pahtawina tengteng Amah pe ding in kisa ni. Huai lah hon siamtu, i Pathian deihdan ahi ngal a!
Unaute zingpha/sunpha. Tuni hun zatnuam chiat.