Galte sual ding in hon panpih in: mihing panpihna zaw bangmahlou phet ahi ngal a. Pathian ziak in hangtak in ka hih ding uh: amah lah hon doute sikdenpa ding ahi ngal (Sam 108:12,13).
Ginna tuh vualzohna ahi!
Israel ten Pathian tellou a, amau hatna kimuang a gal hon dou teng un vuallel uhi. Himahleh a ginna uh Pathian a koih a, muan ngamna hon neih chiang un lohsam ngeilou uhi.
Ginna tuh vualzohna ahi!
Mihing kimuanna tuh a thawn ahi. Khemna tuamtuamte eimah thahatna kia toh i dou leh a vuallelsa ihi. Himahleh Pathian lam a hat a, Pathian hatna tungtawn a i dou theih chiang in Setan in hon taimansan hi.
Hat tak leh hangtak a pang in Toupa leh a thilhih theihna ah muanna koih ni.
Unaute zingpha. Tuni hun zatnuam chiat.