TOUPA aw, ka suangpi leh hon tanpa, ka kam a thupawtte leh ka lungtang a ngaihtuahnate na mitmuh in kipahpihhuai hi hen (Sam 19:14).
Lungsim thoveng tak a ngaihtuahna (meditation) neih kichi tulai khovel ah haksa mahmah hi. I khut a i tawi mobile leh electronic gadget tuamtuamte’n i theihlouh kal in i lungsim leh hun tamtak honna guksak kha nak uhi.
Hiai vanzat phatuam taktakte om ma khovel i ngaihtuah leh Laisiangthou sim a, inkuan kikhopna nei a, inkuan leh lawm leh vual toh houlim tiptip a thu tuamtuam genkhawmna hun tam zaw tham hi.
Himahleh tuchiang in khovel khantouhna ziak in i tutmun ah i khut a i tawi mobile tungtawn in khovel mun tuamtuam a thiltungte ahunhun a theihtheihna kineithei hi. Mitphiatkal sung lel a thu tuamtuam hong tung zungzungte’n ngaihtuahna (meditation) leng hon neisak manlou in i lungsim kikhektou zungzung mai hi. Hiai in i theihlouh kal in i khalam leng honna hetkha mahmah hi.
Hiai vanzat hoih taktakte tungtawn in Pathian’ thu bang sim in ngaih (listen) theih a, i lawm i vual khristian mun tuamtuam a omte toh kithuzak theih veve hi. Thil phatuam tamtak dia i zat kawmkawm in, hiaite omlou a hun dai, Pathian thu ngaihtuah vengveng theihna ding hun awng leh thoveng i bawl a, i zat theih zelzel leng poimoh hi. Huai ding in hun khat pekhe zelzel lehang i khalam ah phatuam mahmah ding hi.
Unaute Toupa’ ni zingpha. Tuni kikhop nuam chiat.